Qyzmettik kólikti jeke sharýasyna paıdalanǵan sheneýnik qoǵamdyq jumysqa jegildi
ASTANA. QazAqparat - Qyzmettik kólikti jeke paıdasyna jaratqan Óskemen qalasy ákiminiń orynbasary Rasýl Manapov qoǵamdyq jumysty bastap ketti. Bul týraly Óskemen qalasy ákiminiń baspasóz hatshysy Ásem Seksenova Feısbýk paraqshasynda jazdy, dep habarlaıdy «QazAqparat» HAA tilshisi.
Eske sala ketsek, QR Memlekettik qyzmet isteri agenttiginiń ShQO boıynsha departamentiniń etıka boıynsha Keńesinde Óskemen qalasy ákiminiń orynbasary Rasýl Manapovtyń qyzmettik kólikti jeke paıdasyna jaratqany týraly shýly oqıǵa taraǵan bolatyn. Qazan aıynda, jeksenbi kúni Rasýl Manapov demalys bazasyna óziniń qyzmettik kóligimen baryp, demalyp júrgeni belgili bolǵan. Qala ákiminiń orynbasary ózine taǵylǵan kináni tolyq moıyndap, «Óskemen tártip» kásipornynda 20 saǵat qoǵamdyq jumys atqarýǵa mindettelgen edi.
«Qoǵamdyq jumysty qala ákiminiń orynbasary memlekettik qyzmet ýaqytynan tys atqaratyn bolady. Búgin ol «Óskemen Tártip» kommýnaldyq kásipornynyń brıgada quramynda 4 saǵat jumys istedi. Rasýl Manapov Respýblıka dańǵylyndaǵy sýburqaqty qysqy maýsymǵa ázirleý jumysyna atsalysty», - deıdi Ásem Seksenova Feısbýk paraqshasynda.
Brıgadaǵa jetekshilik etip júrgen Maqsat Nurahmetov memlekettik qyzmetkerdiń qoǵamdyq jumysqa aralasyp júrgenin birinshi ret kórgenin aıtady.
«Qala ákiminiń orynbasary bar kúshin, ynta-jigerin salyp jumys atqardy. Jarady!» - deıdi MaqsatNurahmetov.
Aıta keterligi, buǵan qosa Óskemen qalasynyń ákimi Qýat Tumabaev qyzmettik kólikti jeke paıdasyna jaratqany úshin Rasýl Manapovqa eki aı boıy qyzmettik kólikti paıdalanýǵa tyıym salǵan bolatyn. Orynbasar qańtar aıynyń birine deıin oljumysqa qoǵamdyq kólikpen keletin bolady.
