Qyzmettik kólikti jeke maqsatyna paıdalanǵan sheneýnik qatań sógis aldy
Bul týraly Pavlodar oblysy boıynsha memlekettik qyzmet jáne sybaılas jemqorlyqqa qarsy kúres Agenttigi memlekettik qyzmet salasyn baqylaý basqarmasynyń bas mamany Rústem Beısenqulov málim etti.
«Ádep jónindegi keńestiń hatshylyǵyna Pavlodar qalasy qurylys bólimi basshysy orynbasarynyń qyzmettik kólikti jumystan tys paıdalanýyna qatysty qyzmettik hat tústi», - Atalmysh fakti boıynsha tártiptik is qozǵalǵan. 2019 jyly 16 aqpanda demalys, ıaǵnı senbi kúni jol-patrýldik polıtsııa batalony tekseris júrgizý kezinde Qamzın kóshesi, 67/1 mekenjaıy boıynsha saǵat 16.00-de «Greenwich» saýda úıiniń aýmaǵynda «Kia Sorento» markaly kóligi turǵanyn anyqtaǵan. Polıtseılerdiń aqparatyna súıensek, kólik Pavlodar qalasynda tirkeýde turǵan jáne sol kezde bólim basshysynyń orynbasary Qanat Qalıev otyrǵan. Ol polıtsııa qyzmetkerleri avtokólikke tıisti qujattardy usynýdy talap etken sátte úıde tastap ketkenin aıtqan. Tártip saqshylary kólikti mamandandyrylǵan avtoturaqqa jetkizgen», - deıdi Rústem Beısenqulov.
Rústem Beısenqulovtyń aıtýynsha, ákimshilik quqyq buzýshylyq týraly elektrondy hattama toltyrý kezinde Qanat Qalıevtiń buǵan deıin Pavlodar qalasynyń ákimshilik sotymen 2016 jyldyń 9 naýryzynda QR ÁQK-niń 1-bólimi, 608-babyna sáıkes mas kúıinde kólik júrgizgeni úshin ákimshilik jaýapkershilikke tartylyp, úsh jylǵa deıin kólik quralyn basqarý quqyǵynan aıyrylǵany belgili bolǵan. Memlekettik qyzmetshige qatysty kólik quralyn júrgizý quqyǵynan aıyrylǵanyna qaramastan kólikti basqarýyna baılanysty hattama toltyrylǵan. Ol jaýap alynǵan kezde óz kinásin moıyndap, saýda úıine qyzyn alyp ketýge kelgenin aıtqan.
«Sol kezde qurylys nysandarynyń ýchaskelerinde boldym. Turǵyndardyń shaǵymdanýyna qatysy Jeleznodorojnyı kentine shaqyrtý túsken. Sondyqtan ruqsatsyz kólikti alyp, jumys toby kelgenge deıin shyǵyp kettim. Kóliktiń kilti mende bolǵan. Júrgizýshi bekitilmegen. 38 myń teńgege eshkim barmaıdy. Zeınetkerlerge ruqsat bermeıdi», - dedi ol.
Foto: Roza Mustafına