Qyzmettik kólikten bas tartý: Isekeshev qandaı kólikpen júredi
ASTANA. QazAqparat - Elorda ákimi Áset Isekeshevtiń qandaı qyzmettik kólikpen júredi? Bul týraly Astana qalasy ákiminiń baspasóz hatshysy Elvıra Júrgenbaeva aıtyp berdi, dep habarlaıdy QazAqparat tilshisi.
«Kún saıyn ákim Toyota HiAce shaǵyn avtobýsymen júredi. Ol qalany aınalyp, jol qurylystaryn baqylap, balabaqshalardy da kórip shyǵady», - dedi Elvıra Júrgenbaeva qala ákimdiginde ótken baspasóz máslıhatynda tilshilerdiń suraǵyna jaýap bere otyryp.
Óz kezeginde Astana qalalyq ortany regeneratsııalaý basqarmasynyń basshysy Ǵanı Isqalıev qyrkúıekten bastap qala basshysy bıznes-klass dárejesindegi taksımen qozǵalatynyn, al laýazymy odan tómen sheneýnikter ekonom-klass dárejesindegi taksımen qozǵalatynyn atap ótti.
«Ákim ártúrli kólikpen júredi. Mıkroavtobýspen de qozǵalatyn kezderi bolady. Bıznes klass dárejesindegi kólikter - olar Kamrı, Shkoda Sýper B. Taksopark kez kelgen kólikti jiberýge quqyly. Ekonom klass dárejesindegiler - qalada júrgen qarapaıym kólikter», - deıdi Ǵanı Isqalıev.
Eske sala ketsek, buǵan deıin astanalyq ákimdiktiń 2018 jyldan bastap, taksı qoldaný boıynsha pılottyq jobaǵa aýysatyny habarlanǵan edi. Osy jyldyń qyrkúıek aıynda qala ákimdik qyzmettik kólikterden bas tartqaly otyr.
