Qyzmettik ıtter, 155 adam qostanaılyq oqýshyny eki aptadan beri izdestirýde
QOSTANAI. QazAqparat – Qostanaı oblysynda eki apta buryn joǵalyp ketken jasóspirim qyzmettik ıtterdiń kómegimen izdestirilýde, dep habarlaıdy QazAqparat oblystyq Polıtsııa departamenti baspasóz qyzmetine silteme jasap.
Іlııas Omarov aýylynyń 17 jastaǵy turǵyny Rýslan Jubanyshev 27 sáýir kúni joǵalyp ketken. Ákesiniń aıtýynsha, Rýslan bir top aýyldasymen balyq aýlaǵa ketip, qaıtyp oralmaǵan. Polıtsııaǵa habar eki kún ótken soń berilgen.
«Sol kúni balyq aýlaýǵa shyqqandardyń bári karantın tártibin buzǵany úshin jaýapkershilikke tartyldy. Qazir olardyń adam joǵalýyna qanshalyqty qatysy bar ekeni tekserilip jatyr. Balyqqa shyqqandardyń arasynda eshqandaı daý-damaı bolmaǵan. Biraq olardyń ishimdik ishkeni anyqtaldy. Rýslandy izdeý sharalary jalǵasýda. Oǵan polıtsııanyń jeke quramy jumyldyrylyp, izdeý toby jasaqtaldy. 25 polıtsııa qyzmetkeri, 5 iz kesýshi ıt, 30-dan astam jergilikti turǵyn jáne 100-den astam volonter qatysýda», - dedi oblystyq Polıtsııa departamenti tergeý basqarmasynyń basshysy Nurlan Arystanov.
Osy kúnderi aýyl mańyndaǵy ózen-kólder, úı aýlalary, qudyqtar men bos ǵımarattardyń ishi tegis tekserilgen. Іzdeýge tótenshe jaǵdaı departamentiniń súńgýir mamandary qosylyp, jaqyn mańdaǵy kólderdi súzip shyqty. Ázirge nátıje joq.
Anyqtalǵandaı, Rýslan Jubanyshev mektepti bıyl aıaqtaıdy.
