Qyzmettik boryshyn atqarý kezinde qaza tapqandardyń januıalary Qytaıǵa bardy (FOTO)
ASTANA. QazAqparat - Qazaqstandaǵy Qytaı Halyq Respýblıkasy elshiliginiń bastamasymen aspan asty eline aptalyq arnaıy sapar uıymdastyryldy. Bul saparǵa qyzmet babynda qaza bolǵan ishki ister organdary qyzmetkerleriniń otbasy músheleri arnaıy tańdalyp alynǵan. Elshiliktiń polıtsııamen baılanys boıynsha bóliminiń bastamasymen uıymdastyrylǵan saparda Qytaı eliniń Beıjiń, Shanhaı jáne Úrimshi qalalaryna bardy, dep habarlady QR ІІM baspasóz qyzmetinen.
Aıta keteıik, Qytaı eline qyzmet babynda qaza bolǵan saqshylardyń jubaılary men ul-qyzdaryn aparyp, tarıhy 2 myń jyldan asyp jyǵylatyn eldiń muraǵatymen, salt-dástúrimen tanystyrý, úlken qalalaryn aralatyp, kórikti jerlerin kórsetý týraly usynys alǵash ret 2015 jyldyń aqpan aıynda Іshki ister mınıstri, polıtsııa general-polkovnıgi Qalmuhanbet Qasymov pen Qytaı Halyq Respýblıkasynyń Qazaqstandaǵy Tótenshe jəne ókiletti elshisi Chjan Hanhýeımen kezdesý barysynda aıtylǵan. Nátıjesinde ekijaqty kelisimge qol qoıyldy.
Qazaq elinen Qytaıǵa attanǵan delegatsııanyń quramynda 20-dan astam adam boldy. Onyń ishinde, Halyq Qaharmany, polıtsııa kapıtany Ǵazız Baıtasovtyń jubaıy Gúljamal Tájıeva men uly Armanjan; qaraǵandylyq jol saqshysy, 2008 jyly elordaǵa jolǵa shyqqan avtobýs toly balalardyń ómirin aman alyp qalam dep, opat bolǵan Qaırat Jumabekovtiń jary Nazgúl Jeksenbına men uly Ǵalym; osydan bes jyl buryn Aqtóbeniń Shubarshy eldi mekenin ǵana emes, dúıim jurtty shýlatqan qylmystyq topty qolǵa túsirý kezinde jalǵyz oq ǵumyryn qıyp ketken «Arlan» arnaıy jasaǵynyń aǵa ınspektory, polıtsııa aǵa leıtenanty Rýslan Joldybaevtyń jubaıy Aıgúl Joldybaeva men qyzy Aıda; asa qaýipti qylmyskerdi quryqtaý kezinde mert bolǵan Almaty qalalyq ІІD Patrýldik polk polıtsııasynyń aǵa serjanty Ǵalymjan Ábdirovtyń jubaıy Gúlnáz Mereeva men qyzy Aıajan; qandy qarashada qandyqol qaraqshynyń qolynan kóz jumǵan jambyldyq jampoz, MKQB-nyń polıtsııa aǵa serjanty Polat Aıanqulovtyń otyn óshirmeı otyrǵan Mııasar ıÝsýpova men qyzy Jansaıa; 2008 jyly qyzmettik mindetin atqarý kezinde qaıtys bolǵan kerekýlik tártip saqshysy, Qashyr aýdandyq ІІB-niń polıtsııa kapıtany Farıd Kakabaevtyń jary Lázzat Kakabaeva men qyzy Amına; eldiń esinde «Keńqııaqtaǵy qyrǵyn» degen ataýmen qalǵan qandy oqıǵa kezinde Aqtóbe jerinde jer jastanǵan «Suńqar» arnaıy maqsattaǵy jasaqtyń bólim bastyǵy bolǵan polıtsııa maıory Aıbolat Imanbaevtyń artynda qalǵan atustary Aıbar men jary Ferýza Málikova; qyzmetten tys ýaqytta júrse de, kórshisine kómekke kelem dep, ajal qushqan Shý stansasyndaǵy ІІJB-niń polıtsııa aǵa serjanty Rahat Amantaevtyń jary Aıman Aıtqulova men uly Nurbolat; 2012 jyly 18 qańtarda qańyrap bos qalǵan ǵımarat ishin tekserip júrip, bir essizdiń myltyǵynan atylǵan oqtan jedel járdem kóliginde kóz jumǵan Kókshetaý qalalyq ІІB-niń jedel ýákili, polıtsııa leıtenanty Qaırat Júsipbaevtyń izin jalǵap qalǵan uly Áltaır men ómirlik serigi Marjan Júsipbaeva; týra 40 jasynda qanypezerdiń atqan oǵynan qaza bolǵan Almaty oblystyq ІІD «Arlan» arnaıy jasaǵynyń aǵa ınspektory Erjan Ahmetovtiń qyzmettik jolyn jalǵap qalǵan jubaıy Baıan Ahmetova men áke armanyn úkilep ósip kele jatqan uly Azamat bar.
QR-daǵy QHR Elshiliginiń keńesshisi Daı Sıýıkýı mundaı sharalar Qytaı men Qazaqstan arasyndaǵy yntymaqtastyqty odan ári tereńdete túsetinin atap ótti.
- Buǵan deıin osyndaı saparlar tek Qytaı men Reseı arasynda ǵana uıymdastyrylyp keldi. Odan basqa birde-bir elmen mundaı kelisim jasalmaǵan bolatyn. Bir jarym jyl buryn meni QHR-dyń Qazaqstandaǵy elshisiniń polıtsııa isteri boıynsha keńesshisi retinde taǵaıyndady. Sol kezden bastap osy ıgilikti isti Qazaqstan Respýblıkasy ІІM-men jańǵyrtý týraly ıdeıany alǵa tartyp keldik. Іshki ister mınıstri, polıtsııa general-polkovnıgi Qalmuhanbet Qasymov bul usynysymyzdy qabyl alyp, bıyl mine, oıymyz júzege asyp otyr. Bul sapardan qazaqstandyq delegatsııanyń ár múshesi, analar da, balalar da úlken áser aldy degen oıdamyn. Urpaǵymyz osy sharany odan ári jalǵastyryp, saltqa aınaldyrady dep úmittenemin, - dedi ol.
