Qyzmettesin óz-ózine qol jumsaýǵa ıtermeledi degen kúdikpen qatardaǵy eki jaýynger ustaldy - QR ІІM Tergeý komıtetiniń áskerı-tergeý basqarmasy
ASTANA. 8 sáýir. QazAqparat - 5 sáýir kúni saǵat 03.35-te 5451 áskerı bóliminiń jedel kezekshisinen habarlama kelip tústi. Onda túngi saǵat úshtiń shamasynda janar-jaǵarmaı materıaldaryn saqtaý qoımasy postynyń qaraýyl bastyǵy baqylaý munarasynan moıyn tusynan oqpen jaralanǵan qatardaǵy jaýynger R.Aqmoldınovti tapqany jóninde aıtylǵan.
Bul týraly QR ІІM Tergeý komıtetiniń áskerı-tergeý basqarmasynan habarlady.
Atalǵan túni Ortalyq aımaqtyq áskerı-tergeý basqarmasynyń Qaraǵandy bóliminen jedel-tergeý toby oqıǵa ornyna birden attandy.
Oqıǵa orny qaralyp, merzimdik jáne kelisimshart boıynsha boryshtaryn ótep jatqan áskerı qyzmetshiler, bólim ofıtserleri suraldy. Ballıstıkalyq, sot-medıtsınalyq saraptamalar belgilendi. Sondaı-aq keshendi sot psıhologııalyq-psıhıatrııalyq jáne fızıkalyq-tehnıkalyq saraptamalar taǵaıyndaý josparlanýda.
Áskerı qyzmetshiniń óz-ózine qol jumsaýyna ákep soqtyrǵan jarǵydan tys qarym-qatynastar faktisi boıynsha qylmystyq is qozǵaldy.
Búgin osy qylmysty jasady degen kúdikpen qatardaǵy jaýyngerler 1993 jyly týylǵan Dıdar A. men Aıdos A. ustaldy.
