Qyzmetten bosatylǵan 62 astanalyq órt sóndirýshi jumysqa qaıta qabyldanbaıdy - V. Bojko
ASTANA. 13 mamyr. QazAqparat - Qyzmetten bosatylǵan 62 astanalyq órt sóndirýshi jumysqa qaıta qabyldanbaıdy.
Bul týraly búgin QR Parlamenti Májilisinde ótken Úkimet saǵatynda Tótenshe jaǵdaılar mınıstri Vladımır Bojko málim etti.
Eske sala ketsek, osydan birshama ýaqyt buryn Astana qalasynyń tótenshe jaǵdaılar departamenti 62 qyzmetkerdi negizgi jumys kúninen bólek ýaqytta qosymsha jumys istegenin jeleý etip, olardy sybaılas jemqorlyq baby boıynsha aıyptap qyzmetten bosatqan edi. Otbasyn asyrý, kredıtti óteý maqsatynda 2-3 jerde qyzmet etken osy qyzmetkerler «jemqorlyq jasamadyq» dep jumysqa qaıta qabyldaýdy talap etken bolatyn.
«Zań bárine ortaq. Eshkim de, onyń ishinde memlekettik qyzmetshiler de zańmen oınamaýy kerek. Al zań boıynsha memlekettik qyzmetkerdiń ustazdyq etýmen jáne ǵylymmen aınalysýdan basqa jumysqa aralasýyna jol berilmeıdi. Ekinshiden, zańnamada, erejelerde sybaılas jemqorlyq qubylystar týdyratyn áreketterdiń tizimi bar. Árıne, bulardyń basym bóligi qaıta qaraýdy talap etedi. Degenmen, jumystan bosatylǵandardyń áreketteri sybaılas jemqorlyq buzýshylyq normasyna jatady. Bul barshaǵa ortaq norma», - dedi depýtattardyń saýalyna jaýap bergen Vladımır Bojko.
Bul rette mınıstr zańnyń múltiksiz oryndalý qajettiligine nazar aýdara kele, «jumystan bosatylǵan 62 qyzmetker qaıta qabyldaýǵa jatpaıdy jáne qabyldanbaıdy da», dep kesip aıtty.
«Biz tutas respýblıka boıynsha osyndaı faktilerge qarsy jumystar atqaryp jatyrmyz. Órt sóndirý qyzmetkerine úsh táýlik demalys 3-4 jumysty qosymsha atqarý úshin emes, onyń tynyǵýy úshin beriledi. Óıtkeni, órt sóndirýshiniń jumysy tym aýyr, adam aǵzasyna áseri kóp», dedi ol.
