Qyzmette tamyr-tanystyqty, komandalyq aýysýdy joıý baǵytynda tıisti sharalar atqarylady
ASTANA. QazAqparat - Elbasynyń Jarlyǵymen qurylǵan QR Memlekettik qyzmet isteri jáne sybaılas jemqorlyqqa qarsy is-qımyl agenttigi memlekettik qyzmette tamyr-tanystyq men jaqyndyqty joıý maqsatyn qoıyp otyr.
Bul týraly búgin Astanada agenttiktiń keńeıtilgen keńesinde osy vedomstvonyń tóraǵasy Qaırat Qojamjarov málim etti.
«Bizdiń kelesi maqsatymyz kadrlardy irikteý men alǵa jyljytýdy jetildirýge baılanysty. Osy oraıda qyzmette tamyr-tanystyq pen jaqyndyqty, qajetti adamdarǵa konkýrstar ótkizýdi, komandalyq aýysýdy joıý baǵytynda tıisti sharalardy qabyldaýymyz qajet»,-dep atap ótti Q. Qojamjarov.
Onyń sózine qaraǵanda, qajet emes tóreshildikti joıý maqsatynda bir óńirdiń ishinde jáne memlekettik organnyń ishinde aýysýdy kelisý tetigin qaıta qarastyrý kerek.
«Mansaptyq ósimniń obektıvtiligi men ádildigin qamtamasyz etý barlyq memlekettik organdar úshin sózsiz ustanymy bolýy tıis. Búginde sheneýniktiń mansaby kóbinese basshynyń sýbektıvti qalaýy men erkine baılanysty. Vedomstvolyq bólek normatıvtik aktiler osyǵan yqpal etýde. Bul turǵyda jaýapty qyzmetterde ózderiniń adamdary paıda bolady, bul óz kezeginde jemqorlyq kestelerin qurý úshin jaǵdaı týǵyzady», -dedi ol.
Osy oraıda Q. Qojamjarov engizilip otyrǵan aqparattyq júıe arqyly negizgi ustanymdardy qorǵaý kúsheıetindigin jáne de bul sharalar memlekettik qyzmettiń sapasyn arttyratyndyǵyn atap ótti.
