Qyzmetshilerine beıádep sóılegen Uıǵyr aýdanynyń ákimi jumystan ketkeli jatyr - Almaty oblysy
TALDYQORǴAN.QazAqparat - Almaty oblysyndaǵy Uıǵyr aýdanynyń ákimi óz erkimen jumystan ketýge aryz jazdy, dep habarlaıdy QazAqparat tilshisi
Qazir Álimjan Tohtasýnovtyń aryzy Prezıdent ákimshiliginiń qaraýynda jatyr. Bul jóninde Almaty oblysy boıynsha Memlekettik qyzmet isteri jáne sybaılas jemqorlyqqa qarsy is-qymyl departamentiniń ókilderi málim etti. Sondaı-aq departamenttegiler beıádep sózge toly aýdıojazbadaǵy daýys Uıǵyr aýdanynyń ákiminiki ekenin rastady.
Esterińizge sala keteıik, jaqynda «Uıǵyr aýdanynyń ákimi Álimjan Tohtasýnovtyń bylapyt sózge toly aýdıojazbasy» delingen aqparattar taraǵan bolatyn. Ol jerde sheneýniktiń jumys barysynda qaramaǵyndaǵylardy balaǵattap jatqany anyq estiledi.
Aıta keteıik, buǵan deıin Almaty oblysy Qyzylaǵash aýylynyń ákimi Sáýle Amıtovanyń basy daýǵa qalǵany týraly habarlaǵan bolatynbyz. Ákimniń ústinen A.A. esimdi azamatsha Ádep jónindegi keńeske aryzdanǵan. Shaǵymdanýshy aýyl ákiminiń dórekiligin dáleldeıtin aýdıojazbany da usynǵan. Aýdıo jazbany tekserý barysynda Aqsý aýdany Qyzylaǵash aýyldyq okrýginiń ákimi S.Amıtovanyń sharýa qojalyǵy basshysymen daýlasqandyǵy anyqtaldy.
