Qyzmetpen birge januıamnyń jaǵdaıyn jasaýǵa da úlgeremin - polıtsııa kapıtany Jamılıa Nurjigitova
TÚRKІSTAN. QazAqparat – Túrkistandyq polıtsııa kapıtany Jamılıa Nurjigitova quqyq qorǵaý salasynda 10 jylǵa jýyq ýaqyt qyzmet atqaryp keledi.
Búginde úsh perzentin tárbıelep otyrǵan kelinshek polıtsııadaǵy qyzmettiń qıyndyǵy názik jandarǵa kedergi keltirmeıtinin aıtady, dep habarlaıdy QazAqparat tilshisi.
TO Polıtsııa departamenti Túrkistan qalalyq polıtsııa basqarmasynyń qyzmetkeri Jamılıa Nurjigitova 10 jylǵa jýyq ishki ister salasynda qyzmet atqaryp keledi. Ol 2010 jyly joǵary oqý ornyn támamdaǵan soń, eńbek jolyn Qyzylorda oblysy ІІD-niń Kámeletke tolmaǵandardy ýaqytsha oqshaýlaý, ońaltý ortalyǵynyń ınspektory laýazymynan bastaǵan. Búginde Túrkistan qalalyq polıtsııa basqarmasynyń shtab bólimshesiniń esepke alý tirkeý tártibiniń ınspektory qyzmetin atqaryp keledi.
«Qyzmettiń qıyndyǵy názik jandardyń bul salany tańdaýyna kedergi emes dep oılaımyn. Kerisinshe, olar erlermen birge qarý alyp, eńbek etip, joǵary jetistikterge jetýde. Men úshin kúıeýim qoldap turǵanda qıyndyq joq. Janymdy túsinetin, úıden erte ketip, keshigip kelip jatsam da túsinistikpen qaraıtyn azamatym barda men almaıtyn qamal joq. Qyzmetimmen qatar januıamnyń jaǵdaıyn da jasaýǵa úlgeremin. Qazir otaǵasy ekeýmiz úsh perzent tárbıelep otyrmyz, taǵy tórtinshisine aıaǵym aýyr. Úıde qyzdarym «Anashym, jumysyńyz qıyn ǵoı, biz ákemizge uqsap dáriger bolamyz» deıdi álden. Soǵan qaraǵanda qyzdarym polıtseı bolmaıdy-aý»,- deıdi polıtsııa kapıtany.
Syr eliniń týmasy búginde Túrkistan jerine kelin bolyp, qara shańyraqta ata-enesimen birge turyp jatqanyn aıtady. Jamılıa Myńjanqyzy jubaıymen kezdeısoq jerde tanysyp, aqyry shańyraq kótergen.
«Kúıeýim Abdýǵanı Júsipbaevpen kezdeısoq tanystyq. Іshki ister salasyna jumysqa turǵanyma 5 aı bolǵan ýaqytta, tisim aýyrdy. Sodan Túrkistan qalasyna emdetýge keldim. Sol kezde aýyrǵan tisimdi emdegen jigit, júregimdi jaýlady. Sol kezden bastalǵan tanystyq úsh ret kezdesýge ulasyp, ekeýmiz shańyraq kóterdik. Úlken qara shańyraqqa kelin bolyp tústim. Sodan beri 10 jylǵa jýyqtapty, úlkenderdiń batasyn alyp tatý-tátti ǵumyr keshýdemiz. Búginde eki qyz, bir ulymyz bar. Birer aıdan soń, kópbalaly ana bolýǵa daıyndalyp júrmin. Bala tárbıesinde adaldyq, birsózdilik, adamgershilik sekildi qasıetterge basa nazar aýdaramyn»,- deıdi polıtseı kelinshek.
