Qyzmetkerlerine 22 mln teńge syıaqy berip, jartysyn qaıtaryp alǵan sheneýnikter sottaldy
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń málimetinshe, Almaty qalasynyń №2 Medeý aýdandyq sotynyń úkimimen Almaty qalalyq mamandandyrylǵan kúzet qyzmeti basqarmasynyń bastyǵy I.Dzıgalıýk, batalon komandıri A.Arashev, onyń orynbasarlary B.Nysanbaev pen A.Orynbaev jeke quramy qyzmetkerlerine berilgen jalpy somasy 22 mln teńge syıaqynyń bir bóligin ózderine qaıtaryp alǵany úshin kináli dep tanylǵan. Olar sol arqyly laýazymdyq ókilettikterdi teris paıdalanǵan.
«Sot úkimimen I.Dzıgalıýk, A.Arashev, B.Nysanbaev jáne A.Orynbaev memlekettik qyzmette, sýdıa qyzmetinde, jergilikti ózin-ózi basqarý organdarynda, QR Ulttyq bankinde jáne onyń vedomstvolarynda, memlekettik uıymdarda jáne jarǵylyq kapıtalynda memleket úlesi 50 paıyzdan asatyn uıymdarda, sondaı-aq ulttyq kompanııalarda jáne holdıngterde laýazymdardy atqarý quqyǵynan ómir boıyna aıyrylyp, 3 jyl 6 aıǵa bas bostandyǵynan shekteldi. Sottalǵandar sondaı-aq 100 saǵat qoǵamdyq jumysqa tartyldy jáne arnaıy polıtsııa ataqtarynan aıyryldy», - dep atap ótedi agenttikten.