Qyzmetkerlerin jumysta kóp ustaıtyn basshylarǵa qatań sharalar qoldanylady
Atalǵan top túrli qyzmetkerlerdi jumysta zańsyz ustaý faktilerin anyqtaý maqsatynda túrli memlekettik organdarǵa jospardan tys tekserý júrgizip keledi.
«QR BǴM, Eńbek jáne halyqty áleýmettik qorǵaý mınıstrligi sekildi ózge de uıymdarǵa turaqty túrde baryp turamyz. Kóptegen adamdar bizdiń jumysymyzǵa oń baǵa berýde. Biz memlekettiń, onyń ishinde Memlekettik qyzmet isteri agenttiginiń halyqty sheneýnikterdiń ozbyrlyǵynan qorǵaý boıynsha jumys istep jatqanyn kórsetkimiz keledi», - deıdi Ǵalym Baıtuq.
Onyń aıtýynsha, basshylyqtyń qandaı da bir sebeppen úıge qaıtpaýynan qyzmetkerlerge de óz jumys oryndarynda qalýǵa týra keledi.
«Eshkimge de jasyryn emes, basshy jumysta otyrsa, qol astyndaǵy qyzmetkerleri de óz jumys oryndarynan ketýge yńǵaısyzdanady. Basshy óz kabınetinde nard oınap otyrǵan shyǵar, kim biledi? Sondyqtan, sheneýnikti jumysta uzaq otyrýynan paıdaly áser koeffıtsıenti kóbeımeıdi», - dep atap ótti qyzmetkerler quqyǵyn qorǵaýshy.
Mundaı jaǵdaılardy Ǵ.Baıtuq memlekettik organ jumystarynyń júıesizdigi jáne mundaı uıymdar men bólim jetekshiliginiń biliksizdigi dep atady. Qoǵam qaıratkeri mundaı máseleler týyndaǵan jaǵdaıda qyzmetkerge qosymsha tólem jasaýǵa shaqyrdy.
«Eger organ júıeli jumys istese, eshkim jumys kúninen keıin keńsede qalmaıdy. Máselen, QR Ádilet mınıstrliginde ýaqyt tártibi qatań saqtalady jáne eshkim jumystan keıin qalmaıdy. Qosymsha jumys úshin aqy tólenýi tıis jáne kúnine eki saǵattan artyq qaldyrýǵa bolmaıdy. Árıne, munda qyzmetkerdiń kelisimi asa mańyzdy», - deıdi Ǵ.Baıtuq.
Sonymen birge, Ǵ.Baıtuq zańdy óreskel buzǵan mekemelerdi atap kórsetti.
«Biz Astana ákimdigin, óńirlerdi jáne mınıstrlikterdi tekserip shyqtyq. Tobymyzdyń habarlaýynsha, QR Bilim jáne ǵylym mınıstrligi men Eńbek jáne halyqty áleýmettik qorǵaý mınıstrlikteri qyzmetkerlerge qatysty birqatar quqyqbuzýshylyqtarǵa jol bergen», - dedi ol.
Sondaı-aq, Baıtuq kelesi jyldan bastap, óz qyzmetkerleriniń quqyǵyn buzǵan basshylarǵa qatysty qatań sharalar qoldanylatynyn habarlady.
«Bizdiń tekserý jumystary jazalaý úshin emes, eńbek sharttaryn jaqsartý úshin júrgiziledi. Jyl sońynda Memlekettik qyzmet isteri agenttiginde arnaıy monıtorıng tobynyń aýqymdy otyrysy ótedi. Top quramynda túrli qoǵam belsendileri bar. Otyrys aıasynda biz teksergen uıymdardyń jaýapty hatshylaryn shaqyryp, reıd esepterin kórsetemiz», - dedi Ǵ.Baıtuq.
«Kelesi jyldan bastap, tekserister qatańdaı túsedi, - dep jalǵastyrdy Baıtuq. - Onda biz qyzmetkerlerdiń kelgen jáne ketken ýaqyty tirkeletin týrnıketter deregin tekseremiz, beınejazbalardy qaraımyz. Odan bólek, jumysta kóbirek otyrǵan qyzmetkerlerge tólengen aqy týraly býhgalterlik esepti tekseremiz. Tekserý nátıjeleri men býhgalterlik esep sáıkes kelmese, qatań sharalar qoldanylady».
