Qyzmetkerlerdiń jemqorlyǵy úshin qansha basshy jumystan ketti

NUR-SULTAN. QazAqparat – QR Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Danııar Bekaıdarov qyzmetkerlerdiń sybaılas jemqorlyǵy úshin basshylardyń jaýapkershilik ınstıtýtyn iske asyrý barysy týraly baıandady, dep habarlaıdy QazAqparat tilshisi.

«Saıası basshylardyń otstavkaǵa ketýine qatysty toqtalsaq, zańnamalyq norma engizilgen sátten bastap 7 sheneýnik qyzmetinen bosatyldy. 10 ákim túrli tártiptik jaýapqa tartyldy. Sońǵy ister boıynsha aıtsaq, óz orynbasaryna qatysty sot úkimin kútpeı Aqmola oblysy Arshaly aýdanynyń ákimi otstavkaǵa ketti. Bıylǵy 12 aqpanda otstavka qabyldandy», - dedi D. Bekaıdarov.

Sonymen qatar ol birinshi basshylardyń tártiptik jaýapkershiligine qatysty málimet aıtty.

«Baǵynyshtylardyń sybaılas jemqorlyǵy jáne aldyn alý jumysynyń álsizdigi úshin 54 birinshi basshy tártiptik jaýapqa tartyldy, onyń 48-i ákimshilik qyzmetshi jáne altaýy kvazımemlekettik sektordyń top-menedjeri. Olardyń 13-i óz laýazymdarynan aıyryldy. Jalpy qazirgi ýaqytta 71 basqarýshy monıtorıngte, onyń ishinde 15-i saıası memlekettik qyzmetshi, 47 ákimshilik jáne 9 kvazımemlekettik sektor sýbektileriniń top-menedjeri bar», - dedi Danııar Bekaıdarov.