Qyzmetkerlerdiń negizsiz qysqartylýyna jol bermeý kerek – Berdibek Saparbaev
Basqosýlarda oblys ákimdigi men kásiporyndardyń ákimshiligi arasynda jumysshylardyń eńbek quqyqtaryn qamtamasyz etý boıynsha yntymaqtastyq týraly birqatar úshjaqty memorandýmdarǵa qol qoıyldy.
Shý qalasy qashannan iri temirjol toraby retinde belgili desek, onda bolat jol magıstraldarynyń qyzmetine baılanysty kóptegen salalyq kásiporyndar shoǵyrlanǵan. Olardyń turaqty jumysy jergilikti turǵyndardyń áleýmettik ahýalyna da tikeleı áser etedi.
Turǵyndardyń kópshiligi osy salada jumys isteýde. Osyǵan kóńil bólgen Berdibek Saparbaev birinshi kezekte aýdannyń eń iri temirjol kásiporyndary bolyp tabylatyn «Qamqor» lokomotıv-jóndeý zaýytyna jáne Shý lokomotıvti paıdalaný deposyna at basyn burdy.
Tsehtardy aralaý barysynda «Qamqor» kásipornynyń dırektory Marat Nurbaev óńir basshysyna kásiporynnyń jumysy, aldaǵy josparlary týraly aıtyp berdi. Zaýyt elektrovozdarǵa tehnıkalyq qyzmet kórsetýmen aınalysady. Munda barlyǵy 320 adam jumys isteıdi, olardyń basym bóligi - jergilikti turǵyndar.
«Shý qalasynda temirjol kolledji bar, sondyqtan biz mamandardyń jetispeýshiligin asa sezinbeımiz. Tek bilikti tokarlar az, biraq mamandardy osy jerde oqyta otyryp, bul jaǵdaıdan shyǵýǵa kúsh salýdamyz», - dedi M.Nurbaev.
Jaqyn arada memlekettik qorǵanys tapsyrysy aıasynda kásiporynda artıllerııalyq qarý-jaraq ta jóndeletin bolady. Qazirdiń ózinde tsehtardyń birinde daıyndyq jumystary bastalyp ta ketken.
Shý lokomotıv paıdalaný deposy 1929 jyly qurylǵan. Berdibek Saparbaev depo boıynsha kezekshilerdiń qyzmettik ǵımarattaryn qarap, qyzmetkerlerdiń jumys kestesi men jumys jaǵdaıyna, jalaqy mólsherine den qoıdy.
«Qamqor» lokomotıv jóndeý zaýyty men Shý lokomotıv paıdalaný deposynyń basshylary ótken jylǵy jumys qorytyndylary týraly esep berdi. Baıandamalaryn muqııat tyńdaǵan Berdibek Saparbaev qyzmetkerlerdi qysqartý jaǵdaılarynyń oryn alýy, olardy áleýmettik qorǵaýdyń qandaı sharalary qolǵa alynǵandyǵy týraly surady.
«Jambyl oblysy halyqtyń tabysy tómen óńirlerdiń qataryna jatady, sondyqtan kásiporyndar men mekemeler basshylarynyń aldynda qyzmetkerlerdiń negizsiz qysqartylýyna jáne olardyń jalaqysynyń tómendeýine jol bermeý mindeti tur. Sonymen qatar, jumyssyzdyq deńgeıin tómendetý maqsatynda jańa jumys oryndarynyń sanyn arttyrý múmkindikterin qarastyrý qajet», - dep atap ótti aımaq basshysy.
Kezdesý qorytyndysy boıynsha oblys ákimdigi, kásiporyn basshylary jáne kásipodaq uıymy arasynda eńbek zańnamasynyń normalaryn qatań saqtaý, shtatty qysqartýǵa jáne qyzmetkerlerdiń tabys deńgeıin tómendetýge jol bermeý týraly úshjaqty memorandýmǵa qol qoıyldy.
