Qyzmetkerler tótenshe jaǵdaıǵa saqadaı saı - QR ІІM
ASTANA. QazAqparat - Qylmystyq atqarý júıesi komıtetiniń Almaty qalasy jáne Almaty oblysy boıynsha departamentine qarasty LA-155/18 Tergeý abaqtysynda ótkizilgen jattyǵýǵa jeke quram men Túrksib aýdandyq ishki ister bóliminiń jáne tótenshe jaǵdaılar jónindegi departamentiniń qyzmetkerleri qatysty.
Jattyǵýǵa departamenttiń rejım, baqylaý jáne kúzet bóliminiń bastyǵy Talǵat Sháribaev, LA-155/18 Tergeý abaqtysy bastyǵynyń mindetin ýaqytsha atqarýshy Dýman Rahmanov, Almaty qalalyq prokýratýrasy jazalardyń oryndalý zańdylyǵyna qadaǵalaý jasaý basqarmasynyń prokýrory Abzal Toltaev, Túrksib aýdandyq ishki ister basqarmasy bastyǵynyń orynbasary J.Baıkenov, osy aýdannyń tótenshe jaǵdaılar jónindegi bóliminiń bas mamany J.Esjanov qatysty.
Joba boıynsha mekemede boı kórsetken jappaı tártipsizdiktiń aldyn alýǵa abaqtynyń 153 qyzmetkeri men ishki ister organynyń 25 saqshysy, MAI-dyń eki, órtke qarsy qyzmettiń bir ekıpajy jáne jedel járdemniń bir brıgadasy qatysyp, tosyn jaǵdaılarda qandaı áreketter jasaıtyndyǵyn tájirıbe júzinde kórsetti. Sonyń nátıjesinde abaqty qapastarynyń birinen boı kótergen tártipsizdik aınaldyrǵan az ǵana ýaqyttyń ishinde aýyzdyqtaldy. Aldymen ádettegideı ishki tártipti ózgertýdi talap etkendermen kelissózder júrgizilip, beıbit kelisimge qol jetkizilmegennen keıin órt sóndirgish kóliginen aǵyny qatty sý jiberilip, qysqa ýaqyt ishinde búlik kóterýge talpynǵandar zalalsyzdandyryldy. Jattyǵý jasandylyqtan ada, ómirde jıi kezdesetin jaǵdaılarmen sáıkestendirile ótkizilgendikten, ol shynaıy oqıǵadaı áser qaldyrdy.
- Tergeý abaqtysyndaǵy jumystyń ózine tán erekshelikteri bar ekenin umytýǵa bolmaıdy. Ol qashan da qyraǵylyq pen jaýapkershilikti talap etedi. Myna uıymdastyrylyp otyrǵan jattyǵýdyń negizgi maqsatynyń ózi sol talaptyń jeke quram arasynda qanshalyqty saqtalǵandyǵyn baıqaý bolatyn. Sátti ótken jattyǵý qyzmetkerlerdiń daıarlyǵynyń joǵary ekendigin kórsetip berdi, - deıdi LA-155/18 Tergeý abaqtysy bastyǵynyń mindetin ýaqytsha atqarýshy Dýman Rahmanov.
