Qyzmetkeri jemqorlyqpen ustalsa, basshysy qyzmetinen kete me - Ádilet mınıstriniń jaýaby

NUR-SULTAN. QazAqparat - Belgili bir vedomstvonyń qyzmetkeri jemqorlyq faktisimen ustalsa, sol memlekettik organnyń basshysy qyzmetinen kete me? Bul suraqqa Ádilet mınıstri Marat Beketaev jaýap berdi, dep habarlaıdy QazAqparat tilshisi.

«Suraq túsinikti. Men bul rette belgili bir jaǵdaıǵa qatysty jaýap bergim kelmeıdi. Sebebi, ózimniń áriptesterimniń jaǵdaıyna qatysty pikir bildirý oryndy dep eseptemeımin (Bilim jáne ǵylym eks-mınıstrine qatysty - avt.). Al jalpy, Memleket basshysynyń bul rette ustanymy anyq. Men Prezıdenttiń ustanymyn áreket kezindegi basshylyq der edim. Sondaı-aq, zańnama jobasyn Memlekettik qyzmet isteri men sybaılas jemqorlyqqa qarsy is-qımyl agenttigi daıyndaǵanyn eske salǵym keledi. Seısenbi kúni ol zań jobasy Parlamentke engizildi. Memlekettik qyzmet salasyn jetildirýge arnalǵan bul zań jobasynda «basshylar óziniń baǵynyshty qyzmetkerlerine jaýapty, eger baǵynyshtynyń sotpen kinási dáleldengen jaǵdaıda, sot úkimi kúshine ense, otstavkaǵa ketýi kerek» degen norma bar», - dedi Marat Beketaev elordada halyqpen esep berý kezdesýinen keıin tilshilerge bergen suhbatynda.

Eske sala ketsek, Qazaqstan Prezıdenti Qasym-Jomart Toqaevtyń tóraǵalyǵymen ótken aıda jemqorlyqqa qarsy is-qımyl máseleleri jóninde jıyn ótken bolatyn. Memleket basshysy elimizde jemqorlyqtyń dendep ketkenine alańdaýshylyq bildirip, bunyń qoǵamǵa qaýipti dert ekenin aıtty.

«Eger biz jemqorlyqty túbegeıli joıýdy mindet etip alsaq, menińshe, memlekettik organ basshylary mundaı jaǵdaıda otstavkaǵa ketýi kerek. Olardyń otstavkaǵa ketýin qabyldaýdy nemese qabyldamaýdy Memleket basshysy sheshedi. Biraq jumystan bosatý týraly aryz jazýy mindetti shara bolýy kerek», - dedi Qasym-Jomart Toqaev.