Qyzmetker aqysyz demalysqa shyqpaı 42 500 teńge alsa zańsyz bolyp esepteledi
«Jaldamaly jumys istep júrgen qyzmetkerler 42 500 teńgeni jumys berýshileri májbúrli túrde aqysyz demalysqa jibergen bolsa ǵana ala alady. Basqa jaǵdaıda 42 500 teńgeni alýǵa bolmaıdy. Ony biz osy kúnge deıin túsindirip keldik. Eger jumystan shyǵyp ketse, oǵan jumysynan aıyrylýyna baılanysty 6 aıǵa deıin tólenetin basqa tólem bar. Ol úshin resmı jumyssyz retinde tirkelýi ǵana jetkilikti», - dedi mınıstr.
Osy rette ol aqysyz demalysqa shyqpasa da 42 500 teńge mólsherindegi áleýmettik tólem alyp jatqan jaldamaly qyzmetkerlerdiń anyqtalyp jatqandyǵyn aıtty. Onyń túsindirýinshe, áleýmettik tólem berý erejesi ázirlengen kezde jumys berýshilerge ózderiniń jumysshylaryn aqysyz demalysqa jbergeni jóninde buıryqtaryn tirkeý nemese banktik esepshottarynda aqshalarynyń joqtyǵyn dáleldep qujat usyný talaby bolǵan. Biraq, qoǵamnyń talabymen, halyqtyń aıtýymen Eńbek mınıstrligi mundaı talapty alyp tastap, habarlandyrý tártibine kóshken.
«Sóıtip ótinish bergen kezde tótenshe jaǵdaıǵa baılanysty tabysynan aıyrylǵanyn kórsetý qajet boldy. Biz ol ótinishke senip tólem jasadyq. Biraq, tártip bolýy kerek. Eger zańda, bizdiń túsindirmelerimizde tek aqysyz demalysqa ketken kezde tólenedi delinse, onda ol tártipti saqtaý kerek. Sonyqtan taǵy da aıtamyn, jeke tulǵalarǵa, jeke kásipkerlikterge, ózi betinshe resmı ne beıresmı jumys istep júrgenderge qatysty esh problema joq. Ýaıymdamańyzdar, eshqandaı aqsha qaıtarý, ne tekserý, tergeý bolmaıdy. Al jumys berýshileri májbúrli aqysyz demalysqa shyǵarmaı turaqty jumysy júrip, turaqty jalaqy alyp júrgenderdiń áreketi zań buzýshylyqqa alyp keledi. Ol durys emes», - dedi Eńbek mınıstri.
Birjan Nurymbetovtyń aıtýynsha, 42 500 teńge áleýmettik tólemi Memlekettik saqtandyrý qorynan tólenip jatyr. Dál osy qor zeıtaqylar men járdemaqylardy, 1 jasqa deıingi bala kútimine qatysty beriletin járdemaqylardy tólep keledi. Sondyqtan bul qor 42 500 teńge áleýmettik tólemdi zańsyz alǵandardan qarajatty qaıtarýdy talap etedi.
«Memlekettik saqtandyrý qory qarajatqa jaýapty bolǵannan keıin aqysyz demalysqa jiberilmegenderge suraý jiberip, aqshany qaıtarýdy talap etedi. Sondyqtan taǵy qaıtalap aıtamyn, tek qana jaldama qyzmetkerler aqysyz demalysqa shyqpaǵandarǵa suraq bar. Olar zańsyz alǵan», - dedi ol.
