Qyzmet kórsetý salalarynan bıýdjetke túsim azaıdy - Qarjy mınıstri

NUR-SULTAN. QazAqparat - Bıylǵy qańtar-sáýir aılarynda qyzmet kórsetý salalarynan bıýdjetke túsim azaıdy. Bul týraly QR Qarjy mınıstri Álıhan Smaıylov aıtyp berdi, dep habarlaıdy QazAqparat tilshisi.

Mınıstrdiń aıtýynsha, memlekettik bıýdjetke 2 trln 663 mlrd teńge kiris tústi. Al respýblıkalyq bıýdjetke 1 trln 660 mlrd teńge tústi nemese jospar 96,5%-ke atqaryldy. Salyqtar boıynsha jospar 61 mlrd teńgege oryndalmady.

«Ásirese qosylǵan qun jáne korporatıvtik tabys salyqtarynyń esebinen kiris túspedi. Jospardyń oryndalmaýyna syrtqy naryqtaǵy faktorlar da áser etýde. Máselen, taý-ken salasynan túsetin kiris kólemi 17% nemese 27 mlrd teńgege azaıdy. Oǵan negizgi eksporttyq pozıtsııalar boıynsha baǵalardyń 2019 jyldyń 4 aıymen salystyrǵanda orta eseppen 19%-ke tómendeýi sebep boldy. Qyzmet kórsetý salalarynan da túsim azaıdy. Іshki taýarlarǵa salynatyn qosylǵan qun salyǵy 24 mlrd teńgege oryndalmady. Onyń basty sebebi - qosylǵan qun salyǵynyń qaıtarylý somasy byltyrǵy jyldyń sáıkes kezeńimen salystyrǵanda 2,2 ese ósti nemese 147 mlrd teńgeni qurady», - dedi mınıstr Úkimettiń búgingi otyrysynda.

Sonymen birge, spıker ımportqa salynatyn qosylǵan qun salyǵynyń 31 mlrd teńgege oryndalmaǵanyn atap ótti. Oǵan úshinshi elderden keletin ımport kóleminiń qysqarýy sebep bolǵan.

«Qytaıdan keletin ımporttyń kólemi 14,5%-ke ıaǵnı 252 mln dollarǵa azaıdy. Tabıǵı jáne basqa resýrstardy paıdalanýdan túsken salyqtar 17,2 mlrd teńgege jáne shıki munaıǵa salyntyn kedendik áketý bajy jospardan 9,8 mlrd teńgege asyra oryndaldy. Jergilikti bıýdjeterdiń óz kiristeri 119%-ke oryndalyp, 1 trln 3 mlrd teńgeni qurady», - dedi Á. Smaıylov.