Qyzmet kóligin jeke maqsatqa paıdalanǵan ákim jazalandy - Aqtóbe oblysy
QR Memlekettik ister jáne sybaılas jemqorlyqqa qarsy is-ımyl agenttiginiń oblystyq departamenti, Ádep keńesi búgin Hazret aýylynyń ákimi Meıirhan Dúısenovke qatysty tártiptik isti qarady. Departamenttegi basqarmanyń bas mamany Sánim Qýantaevanyń aıtýynsha, aýyl turǵyny ákiminiń ústinen aryz túsirgen.
«Mártók aýdanynyń turǵyny Qonysbaı Ádilov aryz jazyp, tekserý jospardan tys júrgizildi. Aryzda Hazret aýyldyq okrýginiń ákimi Meıirhan Dúısenovtiń qyzmettik kólikti óz qajettiligine paıdalanyp, bıýdjettik mekemege tıesili kómirdi ıemdengenin jazǵan. Tekserý kezinde ákimnen, aryzdanýshydan jazbasha túsinikteme alyndy. Aýyl ákimi óz túsiniktemesinde jeke kóligi buzylǵan kezde qyzmettik kóligimen oblys ortalyǵyna barǵanyn jasylmady. Ol otbasymen qalaǵa barǵan. Bul isi áleýmettik jelige jarııalanyp, qoǵam tarapynan synǵa ilikti. Ári ákimdikte 11 jyldan beri kúzetshi bolyp jumys isteıtin Davletova óz túsiniktemesinde ákimniń qyzmettik kólikti turaqty jeke maqsatqa paıdalanyp, aýlasyndaǵy qoqystardy shyǵaratynyn jazdy»,- dedi departamenttegi basqarmanyń bas mamany Sánim Qýantaev.
Ádep keńesine kelgen Hazret aýylynyń ákimi Meıirhan Dúısenov jeke kóligi buzylǵan kezde qyzmettik kólikti paıdalanǵanyn jasyrmady. Ári bul isiniń qaıtalanbaıtynyn jetkizdi.
«Qoqys tasydy degen sózge kelispeımin. Senbilik kezinde kólikke tirkeme tirkep, qoqys shyǵaramyz. Ol jeke emes, aýyldyń qoqysy. Biraq kóligim buzylǵan kezde qyzmettik mashınany paıdalanǵanym ras»,- dedi aýyl ákimi.
Ádep keńesi sógis berýdi usyndy. Keńes músheleri biraýyzdan qoldady.