Qyzmet barysynda jaraqattanǵan polıtseıdiń otbasy baspana tólemderin alýdy jalǵastyrady
NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine ónerkásiptik qaýipsizdik, ındýstrııalyq aımaqtar, janýarlar dúnıesi, erekshe qorǵalatyn tabıǵı aýmaqtar, energetıka, tabıǵı monopolııalar jáne ishki ister organdary qyzmetkerlerine turǵyn úı tólemderi máseleleri boıynsha ózgerister men tolyqtyrýlar engizý týraly» zań jobasy qaraldy.
Qujatqa tolyqtyrý engizilgendikten, zań jobasy Májiliske qaıtaryldy, dep habarlaıdy QazAqparat tilshisi.
Zań jobasynyń maqsaty - ónerkásiptik qaýipsizdik, ındýstrııalyq aımaqtar, janýarlar dúnıesi, erekshe qorǵalatyn tabıǵı aýmaqtar, energetıka, tabıǵı monopolııalar jáne turǵyn úı qatynastary salasynda zańnamalyq aktilerdi odan ári jetildirý.
Atap aıtqanda, Senat depýtattary qyzmet babynda qaza tapqan polıtsııa qyzmetkerleriniń otbasyna turǵyn úı járdemaqysyn tóleýdi usyndy. Qyzmet barysynda qaza tapqan nemese jaraqat alǵan polıtsııa qyzmetkerleriniń otbasylary endi baspana tólemderin alýdy jalǵastyra beredi. Senatorlar búgin Zań jobasyna osyndaı túzetý engizip, ony Májiliske qaıtardy.
Bul tarmaq buryn rettelmegen bolatyn. ıAǵnı eger polıtseı qyzmet kezinde jaraqat alyp, ne qaıtys bolsa turǵyn úı járdemaqysy toqtatylatyn. Bul polıtseı men onyń otbasynyń onsyz da kúrdeli jaǵdaıyn edáýir qıyndatady. Senatorlar saqshylar otbasy osyndaı jaǵdaıǵa dýshar bolǵan kezde belgilengen tólemderdi ıpoteka merzimi aıaqtalǵanǵa deıin nemese jaldamaly turǵyn úı tolyq satyp alynǵanǵa deıin saqtap qaldyrý týraly usynys aıtty.
«Bas komıtet qyzmettik mindetterin oryndaý kezinde aýyr jaǵdaıǵa tap bolǵan: jaraqat alǵan, bir jerin syndyrǵan nemese kontýzııa alǵan ishki ister organdarynyń qyzmetkerlerin, sondaı-aq qaza tapqan qyzmetkerdiń otbasy múshelerin áleýmettik qorǵaýǵa arnalǵan túzetýler usynyp otyr. Onda, atap aıtqanda, ıpotekalyq shart nemese keıinnen satyp alynatyn turǵyn úıdi jaldaý sharty boıynsha mindettemeler oryndalǵanǵa deıin buryn belgilengen turǵyn úı tólemderin Úkimet belgilegen mólsher men tártipte saqtaý usynylady», - dep atap ótti senator Sergeı Ershov óz baıandamasynda.
