Qyzmet barysynda kóz jumǵan polıtseıdiń balalaryna noýtbýk tartý etildi
ÓSKEMEN. QazAqparat – Shyǵys Qazaqstan oblysynyń tártip saqshylary qyzmettik mindetin oryndaý kezinde kóz jumǵan áriptesteriniń otbasylaryna kómek kórsetýde, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń habarlaýynsha, polıtseıler Tótenshe jaǵdaı rejımi engizilgeli beri qoǵamdyq tártipti saqtaýmen qatar qaıyrymdylyq sharalarynan da qalys qalmaýda. Naqty aıtqanda, muqtaj jandarǵa azyq-túlik, medıtsınalyq maskalar men antıseptıkter taratýda.
Jýyqta departament bastyǵynyń orynbasary, polıtsııa polkovnıgi Renat Ýnarbekov bastaǵan tártip saqshylary kópbalaly otbasynyń úıine barǵan. 34 jastaǵy ana kámelettik jasqa tolmaǵan 7 balany tárbıelep otyr. Onyń úsheýi marqum apaıynyń búldirshinderi eken.
«Qıyn jaǵdaıǵa tap bolǵan januıaǵa azyq-túlik sebeti berildi. Sondaı-aq qashyqtan oqyp jatqan balalarǵa noýtbýk syıǵa tartyldy», - dep habarlady vedomstvo ókilderi.
Budan bólek, qyzmettik mindetin oryndaý kezinde kóz jumǵan polıtsııa qyzmetkerleriniń otbasylary da nazarsyz qalmaǵan. Taıaýda Rýslan Nurǵalıevtiń 3 balasyna noýtbýk tartý etildi.
