Qyzmet barysynda qaza tapqan polıtseıdiń isi: sot úkim shyǵardy
QOSTANAI.QazAqparat – Búgin Qostanaıdyń qylmystyq ister jónindegi mamandandyrylǵan aýdanaralyq sotynda polıtsııa qyzmetkeri Darhan Bazarbaevty óltirdi dep aıyptalǵan Mıhaıl Prokýratovqa úkim shyǵaryldy, dep habarlaıdy QazAqparat oblystyq sottyń baspasóz qyzmetine silteme jasap.
Sot M.Prokýratovqa 19 jyl bas bostandyǵynan aıyrý jazasyn taǵaıyndady. Ol jazasyn qaýipsizdik jaǵdaıy asa joǵary túzetý mekemesinde óteıdi.
«Sondaı-aq, oǵan jazasyn óteý mekemesinde ishimdikke táýeldilikten májbúrlep emdeý sharasy bekitildi. Qaza tapqan adamnyń ákesine moraldyq zııannyń ornyn toltyrý maqsatynda 5 mln teńge kóleminde qarjy tóleıdi. Sonymen qatar, sot eki jeke qaýly shyǵardy. Birinshisi Mıhaıl Prokýratovtyń ápkesiniń jaýap alý kezindegi zań buzýshylyqtaryna qatysty boldy. Ekinshi qaýlyny sot jábirlenýshilerdiń biri Zolotorenkonyń aıǵaqtaryna qatysty shyǵardy. Zolotorenko jaýap berý kezinde shatasyp, sot barysynda aıǵaqtaryn tolyǵymen ózgertti», - delingen sottyń habarlamasynda.
Mıhaıl Prokýratovtyń qorǵaýshysy sottan «Polıtsııa qyzmetkerin óltirý» babyn «Kisi óltirý» babyna aýystyrýdy surady. Sot muny qabyldamady, sebebi protsess barysynda sottalýshy esiktiń aldynda polıtseıdiń turǵanyn jaqsy bildi.
Aıta keteıik, polıtsııa serjanty Darhan Bazarbaev 19 qańtarǵa qaraǵan túni qyzmettik boryshyn atqarý ústinde qaskóıdiń qolynan mert bolǵan edi. Óz otbasyn qyryp-joımaq bolyp, qoqan-loqy kórsetken 28 jastaǵy Tobyl qalasynyń turǵyny shaqyrtýmen barǵan Darhanǵa pyshaq salǵan. Oqıǵa ornyna kelgen jedel járdem serjantty qutqaryp qala almady.
Osy jyldyń qańtar aıynda Memleket basshysy Qasym-Jomart Toqaevtyń Jarlyǵymen qyzmettik boryshyn atqarý barysynda erlik pen janqııarlyq kórsetken Darhan Bazarbaev ІІІ dárejeli «Aıbyn» ordenimen marapattaldy.
