Qyzmet babynda qaza tapqan polıtseıdiń qurmetine Erlik buryshy ashyldy
QOSTANAI. QazAqparat – Qazaqstan polıtsııasy kúni qarsańynda Qostanaı oblysy polıtsııa departamentiniń mýzeıinde qyzmettik boryshyn oryndaý kezinde qaza tapqan Darhan Bazarbaevty eske alýǵa arnalǵan Erlik buryshy ashyldy, dep habarlaıdy QazAqparat.
Eske salaıyq, polıtsııa serjanty Darhan Bazarbaev 19 qańtarǵa qaraǵan túni qyzmettik boryshyn atqarý ústinde qaskóıdiń qolynan mert bolǵan edi. Óz otbasyn qyryp-joımaq bolyp, qoqan-loqy kórsetken 28 jastaǵy Tobyl qalasynyń turǵyny shaqyrtýmen barǵan Darhanǵa pyshaq salǵan. Oqıǵa ornyna kelgen jedel járdem serjantty qutqaryp qala almady.
Prezıdent Jarlyǵymen polıtsııa qyzmetkeri qaıtys bolǵannan keıin «ІІІ dárejeli Aıbyn» ordenimen marapattaldy.
Darhan Bazarbaevty eske alýǵa arnalǵan Erlik buryshy Qostanaı oblysy polıtsııa departamentiniń mýzeıinde ashyldy.
«Darhan Bazarbaev týraly estelikter bizdiń júregimizde máńgi saqtalady. Ol quqyq qorǵaý salasyn tańdaǵan jas mamandar úshin adaldyq pen abyroıdyń úlgisi bolyp qalady. Darhan qazaqstandyq polıtsııanyń dańqty dástúrlerin jalǵastyrdy, qyzmettik boryshyna adaldyq tanytyp, batyrlyqtyń úlgisin kórsetti», - dep atap ótti Qostanaı oblysy PD bastyǵynyń orynbasary Ardaq Yntyqbaev.
Sondaı-aq, oblys departamentiniń murajaıynda erlikpen qaza tapqan Ǵazız Baıtasov pen Medet Dosymhanovty eske alýǵa arnalǵan stendter ornalasqan. Onda tártip saqshylarynyń erlik isteri, ómirbaıany jazylyp, marapattary saqtalǵan.
