«Qyzǵaldaqtar gúldengende» atty Ortalyq Azııa qolóner sheberleriniń kórme-jármeńkesi ashyldy
ALMATY. 5 naýryz. QazAqparat /Áıgerim Ámir/ - Almatydaǵy QR Memlekettik ortalyq murajaıy «Baqyt» Dekoratıvti qoldanbaly óner ortalyǵymen birlese «Qyzǵaldaqtar gúldengende» atty qolóner kórme-jármeńkesin ótkizip jatyr.
Ol 8 naýryz merekesine oraı uıymdastyrylyp otyr.
Qazaqstan, Ózbekstan, Qyrǵyzstan, Túrikmenstan jáne Reseı elderiniń barlyq aımaqtarynan kelgen qolóner sheberleri Ortalyq Azııa aýmaǵynda ótkiziletin eń iri shyǵys kórmesinde ózderiniń úzdik týyndylaryn usyndy.
Kórmege - kıim, zergerlik buıymdar, qysh ydystar, mýzykalyq aspaptar, shyǵys mınıatıýralary, teri ónimderi, kıiz, jibekten jasalǵan buıymdardyń keń aýqymyndaǵy syılyqtar men kádesyılar qoıylǵan. Bul kórmeden ulttyq buıymdardyń ár túrli tehnologııamen órnektelip, gúldendirilip jasalǵanyn kóre otyryp, olardyń ulttyq kórkemónermen tyǵyz baılanysty ekenin baıqaýǵa bolady.
«Biz barsha amatylyqtarǵa jáne qala qonaqtaryna ulttyq qolóner sheberleriniń týyndylary arqyly kóktem merekesiniń jylýyn, ádemiligin syılaǵymyz keldi. Bul merekeni barlyq qalalyqtar kútetini ras. Munda Orta Azııa elderiniń 150- den asa qolónershileri óz týyndylaryn ákelip otyr. Jármeńkede tek kórme buıymdaryn qyzyqtap, ony satyp alýǵa ǵana emes, sonymen qatar, jańa dostar men eski tanystardy kezdestirip, kóptegen jańa aqparattar alýǵa bolady» - deıdi, sharany uıymdastyrýshy, «Baqyt» Dekoratıvti qoldanbaly óner ortalyǵynyń tóraǵasy Baqyt Ábdikárimov.
Sondaı-aq, kórmege kelýshilerge arnap, qyshpen jumys jasaý ádisteri jóninde sheberlik synyptary júrgizildi. Onda kórermender tek qysh ónerin qyzyqtap qana qoımaı, sonymen qatar, qysh buıymdaryn óz qoldarymen jasaý múmkindigine ıe boldy. Ony Qazaqstannyń qyshpen jumys isteıtin sýretshileri Marat Sársebaev jáne Álıasqar Musaev ótkizdi.
