Qyzǵaldaq julǵandar jazaǵa tartylady - Túrkistan oblysy
TÚRKІSTAN. QazAqparat - Túrkistan oblysynda qyzǵaldaqtardy julǵandarǵa jaza qoldanylýda. Bul týraly oblystyq Polıtsııa departamenti Jergilikti polıtsııa qyzmeti basqarmasy tabıǵatty qorǵaý tobynyń aǵa ınspektory Nurlan Tumanbaev málim etti, dep habarlaıdy QazAqparat tilshisi.
Nurlan Tumanbaevtyń sózinshe, QR Qyzyl kitabyna engizilgen «Greıg» jáne «Kaýfman» qyzǵaldaqtaryn zańsyz julý men avtojoldar boıynda, basqa da oryndarda satý jaıttaryn anyqtaý maqsatynda turaqty túrde reıdtik is-sharalar uıymdastyrylýda. Mundaı zańbuzýshylyqqa jol bergenderge QR qylmystyq kodeksiniń 339 babynda kózdelgen qylmystyq jaýapkershilik qarastyrylǵan.
«Quqyqbuzýshynyń áreketi dáleldengen jaǵdaıda sot sheshimimen 3 myń aılyq eseptik kórsetkishpen aıyppul salynady nemese bas bostandyǵynan aıyrylýy múmkin», - dedi Nurlan Tumanbaev.
Al, oblystyq Orman sharýashylyǵy aýmaqtyq ınspektsııasynyń bólim basshysy Hamıt Jorabekov qyzǵaldaqtardy qorǵaýǵa baǵyttalǵan sharalar barysyn aıtyp ótti. Sondaı-aq, Syrdarııa - Túrkistan Memlekettik óńirlik tabıǵı parkiniń týrızm bóliminiń basshysy Ǵanı Nazarbek tabıǵat aıasynda demalýǵa shyqqan kópshilik áleýmettik jelide qyzǵaldaqtarmen túsken sýretin esh qymsynbastan jarııalap jatqanyn aıtty. Turǵyndardy sırek kezdesetin ósimdikterdi kózdiń qarashyǵyndaı saqtaýǵa shaqyrdy.
