Qyzǵaldaq satqan OQO turǵynynyń ústinen qylmystyq is qozǵaldy
ShYMKENT. QazAqparat - Ońtústik Qazaqstan oblysynda qyzǵaldaq satqan turǵyn ákimshilik jazaǵa tartyldy.
Qazyǵurttyq jigit qyzyl kitapqa engen gúldi Almaty-Termez tasjoly boıynda saýdalap, tabys tappaq bolǵan, dep habarlaıdy QazAqparat HAA tilshisi.
Aıǵaqty zat retinde qyzǵaldaq gúlderi tárkilenip, atalǵan jaıt boıynsha QR QK 339-baby («Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý») boıynsha qylmystyq is qozǵaldy. Jergilikti jáne tabıǵatty qorǵaý polıtsııasy qyzmetkerleriniń toby birlesken jedel is-sharasy barasynda ózge de zańbuzýshylyqtardy anyqtady. Eki kúndik reıd barysynda jer qoınaýyn zańsyz paıdalaný, sondaı-aq ań jáne balyq aýlaý, aǵash kesý sekildi buzýshylyqtarǵa tosqaýyl qoıyldy. Máselen, Keles ózeni arnasynda zańsyz jer qoınaýyn paıdalanyp jatqan Saryaǵash aýdanynyń turǵyny da endi zań aldynda jaýap beretin boldy. Óńirdiń tártip saqshylary 52 jastaǵy azamatty ekskavatormen jáne júk kóligimen qazba baılyqty tıep jatqan jerinen qolǵa túsirdi. Atalǵan fakti boıynsha Qylmystyq kodekstiń 334-babymen («Jer qoınaýyn óz betinshe paıdalaný») is qozǵalyp, tergeý amaldary júrgizilýde.
