Qyzdyń ólimine kináli qylmysker sot zalynda ózgelerge ses kórsetti
ASTANA. QazAqparat - Shyǵys Qazaqstan oblysy Shar qalasynyń turǵyny 14 jastaǵy Aıym Ultombaevany óltirgen qylmyskerge qatysty sot qaraýy aıaqtaldy.
ShQO qylmystyq ister jónindegi mamandandyrylǵan aýdanaralyq soty ony jazasyn qatań rejimdegi abaqtyda óteýmen 25 jylǵa bas bostandyǵynan aıyrdy.
«Qaıǵyly oqıǵa ótken jyly, 12 qyrkúıekte boldy. Tún ishinde kórshisine esik ashqan qyz ómirimen qosh aıtysty. Úıde kishi inisi qalǵan, al anasy túngi aýysymǵa jumysqa ketken», dep habarlaıdy yk.kz.
Aıymdy polıtsııa, týystary, eriktiler uzaq izdestirdi. Biraq oqýshy qyz izim-qaıym joǵaldy. Tek kóktemde qyzdyń denesi qala mańyndaǵy qoqys arasynan tabyldy. Kúdikti tabylǵan kezde Semeıde áıeldi zorlaǵany úshin qamaýǵa alynǵan edi. Keıinirek, ol sondaı-aq Shar qalasynda taǵy bir áıeldi zorlamaq bolǵany anyqtaldy.
«Qylmysker sotta ókingen de joq, kinásin moıyndamady. Kináli emespin dedi, jasym 24-te ǵana, dep uzaq merzim bermeýdi ótindi. Tipti ózge jábirlenýshilerge ses kórsetti», - dedi qyzdyń anasy Zımhan Ybraıymova.
Ol alǵashynda jetim qalyp, ata-ájesiniń qolynda ósken kórshisinen esh kúdiktenbegenin aıtty. Óz izin sheber jasyrǵany sonshalyq, aıǵaqtar alý úshin eki ret eksgýmatsııa jasaýǵa týra kelgen.
