Qyzdy kózinen atqan blogerge qatysty is sotqa jiberildi
ASTANA. QazAqparat - Protsessýaldyq prokýror jasóspirimniń kózine oq atqan Gadjıevke qatysty qylmystyq is boıynsha aıyptaý aktisin bekitti jáne is kámelettik jasqa tolmaǵandar isi boıynsha mamandandyrylǵan aýdanaralyq sotqa jiberildi, dep habarlady Alau.kz Qostanaı oblysynyń prokýratýrasynyń baspasóz qyzmetine silteme jasap.
Tergeý nusqasy boıynsha aıyptalýshy jábirlenýshige sol kóziniń almasyn tesip ótken jara túrinde dene jaraqatyn keltirdi. Saldarynan qyzdyń kózi kórmeı qaldy. Bul densaýlyqqa aýyr zııan keltirý retinde jikteledi.
Eske salsaq, 2016 jyly 5 shildede Gadjıev Altynsarın kóshesinde salynyp jatqan eki qabatty ǵımaratta pnevmatıkalyq tapanshadan 13 jastaǵy qyzdyń kózine oq atqan. Artynsha oqıǵa ornynan boı tasalap, oǵan izdeý jarııalanǵan.
Osy jylǵy aqpanda ol Chelıabınskide ustaldy. 11 maýsymda Qazaqstanǵa jetkizildi. Qazir ol abaqtyda jatyr. Sotaldy tergeýde anyqtalǵandaı, Gadjıev jábirlenýshiniń jasyn bilgen. Ol sot aldynda jasóspirimge qatysty densaýlyǵyna qasaqana aýyr zııan keltirgeni úshin jaýap beredi.
