Qyzdaryn tramvaı basyp ketken otbasyǵa pavlodarlyqtar jańa páter alyp berdi
«Klýb dobrıakov Pavlodar» eriktileri Shynar Ýalıtova men onyń 8 jasar Maral jáne eki jasar Batyrhan esimdi balalaryna jańa qonysyn kórsetti.
Eske salaıyq, jantúrshigerlik jol apaty Pavlodar qalasynda 7 qyrkúıek kúni boldy. Saldarynan bir qyz kóz jumdy.
Qyzynan qapyda aıyrylǵan Shynarǵa quny 8,5 mıllıon teńge bolatyn jıhazdary bar úsh bólmeli baspana satyp alyndy. Sol kúni klýb óziniń Instagram paraqshasynda zardap shekken otbasyǵa kómek jınaýdy bastaǵanyn habarlaǵan. Keıin eriktiler men oblystyq bilim salasynyń ókilderi qosylyp, kómekti birge jasady. Nátıjesinde qaıyrymdylyq maqsatta 20 mıllıon teńge jınalǵan .
«Men qonaqqa barlyq Pavlodarlyqtardy shaqyrdym. Óıtkeni onyń turǵyndary qıyn sátterde bizge kómek qolyn sozdy, men sol úshin jerlesterimizge zor alǵys bildiremin», - dedi Shynar Ýalıtova.
Aıta keter jaıt, Maral men Batyrhannyń attaryna jeke shot ashylyp, oǵan 3 mln 213 myń teńgeden aqsha salyndy. Olar ony kámelettik jasqa tolǵan kezde paıdalana alady. 1 mln teńge balalardyń anasynyń shotyna qajettilikter úshin aýdaryldy. Sondaı-aq, Shynar Ýalıtova otbasy úshin «qaıyrymdy qala turǵyndary» jınaǵan qarajattyń 2 mln teńgesin shuǵyl operatsııa kútip otyrǵan basqa 6 balany emdeý úshin jumsady.