«Qyzdardan» nege qashamyz?» - baspasózge sholý
***
«Qazirgi qazaq qoǵamy qyz ataýlyǵa qyryn qaraıtyndaı ma, qalaı? Babalardan jetken qurmet-syıdyń kókesi qyzdarǵa arnalmaýshy ma edi! «Qyz - jatjurttyq» dep tórge ozdyratyn qashanda. Aqyn bitkenniń ádebıet álemine basqan qadamy da, tyrnaqaldy týyndysy da boıjetkender aýylynan bastaý alatyn», dep jazady «Egemen Qazaqstan» gazeti senbilik sanyndaǵy «Qyzdardan» nege qashamyz?» degen taqyryptaǵy maqalasynda.
Basylym avtorynyń jazýynsha, álem chempıonatynda aldyna el salmaǵan Qazaqstan quramasy týraly teńeýdiń neshe atasy aıtyldy. Jeńisti de, jetistikti de qazaq jýrnalısteri japa-tarmaǵaı jerine jetkize jazdy, elden súıinshi surady. Qazaqstannyń áıelder quramasy álem chempıonatynda tolaǵaı tabysqa jetti dep. «Súıinshi suraǵany, maqtanǵany durys-aq, al «áıelderi» nesi?!», dep saýal qoıady avtor. «Keńestik ıdeologııadan ońbaı taıaq jesek te, áli de sol jaqqa qa¬rap emirenemiz de turamyz. «Jenşınany» jetektep ákelip tikeleı tárjimalap, altyn asyqtaı qyzdarymyzdy «áıelderge» telip júrgenimiz sonyń saldary. Áıtpese, «Qazaqstannyń qyzdar quramasy» degen ataý ádemi estiledi emes pe! Aıtpaqshy, Almatydaǵy qyzdar pedagogıkalyq ýnıversıtetin sport jýrnalısteriniń qalybyna salatyn bolsaq, masqara bolmaımyz ba?!.», - dep túıindelgen maqala.
Keshe «Qazmedıa ortalyǵy» ǵımaratynda Ádilet mınıstri Berik Imashev beınekonferentsııa baılanysy rejiminde halyq aldynda esep berdi. Mınıstrmen bolǵan eseptik kezdesýge, ádilet organdarynyń ardagerleri, qala turǵyndary men kásipkerler ókilderi kelip qatysyp, vedomstvonyń buǵan deıingi atqarǵan jumystary men aldaǵy josparlary týraly jan-jaqty maǵlumattar ala aldy. Osy kezdesý arqaý bolǵan maqala el gazeti «Egemen Qazaqstannyń» senbilik sanynda «Ońtaıly sheshimder - ýaqyt pen qarjy únemdeýdiń tıimdi tetigi» degen taqyryppen berilgen. Basylymnyń jazýynsha, mınıstr 2015 jyly halyqaralyq kelisimder men normatıvtik-quqyqtyq aktilerdiń 711 jobasy engizilgendigine nazar aýdartty. Onyń keltirgen málimetine qaraǵanda, qazaqstandyq sharttyq baza 3683 halyqaralyq kelisimderdi qamtyǵan. Sondaı-aq, joǵary zań shyǵarýshy organ ratıfıkatsııalaǵan 1190 kelisim erekshe basymdyqqa ıe». Bizge zań-gerlik saraptamaǵa jyl saıyn 70 zań jobasy, 2 myńǵa jýyq Prezıdent pen Úkimet aktileriniń jobalary, sondaı-aq, 10 myńnan astam ortalyq jáne jergilikti organdardyń normatıvtik-quqyqtyq aktileri kelip túsedi», - dedi Berik Májıtuly.
***
Aqtóbede lańkester basyp alǵan avtobýstyń júrgizýshisi óz ómirinde sol bir eń qorqynyshty sátti «Ekspress K» gazetine tarqata aıtyp beripti. «Avtopark» JShS-niń júrgizýshisi Murat Isekenovtyń jadynda 5 maýsym kúni óshpesteı bolyp qaldy. Ómiriniń sońǵy sátine deıin ol tiri qalǵany úshin Allaǵa alǵys aıtyp ótpek.
Sol kúni avtobýs róline otyrǵan Murat birinshi baǵdar boıynsha qatynaýy tıis edi. Tús aýa ol «Pallada» qarý-jaraq dúkenine jaqyndaı bergende polıtsııa kóligi kelip toqtatyp, odan azamattyq kıimdegi qarýly adamdar avtobýsqa basyp kirgen. Osydan keıin olar júrgizýshiden basqa barlyq jolaýshylardy shyǵaryp jibergen. 30-ǵa jýyq lańkes júrgizýshige toqtamýdy jáne jolynda kezdeskenniń barlyǵyn qaǵýdy buıyrǵan. «Áskerı bólimge jaqyndaǵanda sodyrlar tiri qalǵyń kele dep surady. Sonymen qatar, olar tiri qalý úshin jalǵyz múmkinshiligim bar ekendigin aıtyp, bar jyldamdyqpen áskerı bólim qaqpasyn buzyp kirýdi jáne avtobýsty qarý-jaraq qoımasyna deıin jetkizýdi tapsyrdy», - dep eske alady Murat. Tolyǵyraq, basylym betinen tanysýǵa bolady.
«Taldyqorǵandyq jalǵyz basty atalar men apalar «60 jastan asqandar» dep alatyn klýb qurdy. 14 jyldyń ishinde dál osy klýbta tanysqan 16 jup shaqyraq kóterdi», - dep jazady «Ekspress K» gazeti.
Basylymnyń jazýynsha, klýb jumysy ıesiz qalǵan jertóleden bastalǵan. Qarttar óz kúshterimen ǵımaratqa jóndeý jumystaryn júrgizip, jıhazben jabdyqtaǵan. Odan keıin magnıtafon satyp alyp, bı keshterin ótkize bastaǵan. «Bizdiń klýbymyz 14 jylǵa jýyq ýaqytan beri jumys istep tur. Úıde teledıdar aldynda otyrǵannan góri bas qosyp, qyzyqty dúnıelermen aınalysqanǵa ne jetsin», - dedi Dına Gavrılenko.
