Qyzdar jigitterdi sabaıtyn jaǵdaıǵa jettik - Saparbaev
AQTÓBE. QazAqparat - Aqtóbede jastar isi jónindegi keńestiń otyrysy ótti. Óńir basshysy Berdibek Saparbaev qyzdar arasyndaǵy tóbeles pen qyzdardyń jigitterdi sabaý deregi jıi tirkeletinin aıtyp, jumysty kúsheıtýdi tapsyrdy, dep habarlaıdy QazAqparat tilshisi.
Aqtóbe halqynyń 27 paıyzyn jastar quraıdy. Oblys halqynyń 222 myńy jastar bolsa, onyń 51 myńnan astamy orta arnaýly nemese joǵary oqý ornynda bilim alady. Óńirde 69 jastar isi jónindegi komıtet jumys istep tur. Aqtóbe oblystyq ákimdiginde ótken jastar isi jónindegi keńeste jastardy jumyspen qamtý, bos ýaqyttaryn tıimdi paıdalaný, olardyń belsendiligin arttyrý sóz boldy. Bul salaǵa jyl saıyn 480 mıllıon teńgeden astam qarjy bólinedi. Degenmen jyldyń qorytyndysy tyńdalǵan keńeste kemshilikter tizbekteldi..
«Sport, mádenı ǵımarattar bos turmaýy qajet. Olar tańnyń atysy, kúnniń batysyna deıin jumys isteýi kerek. «Demalys, mereke kúnderi keshkilik qaıda baratynymyzdy bilmeımiz» dep aıtady. Jastar túngi klýbta júredi, tóbelesedi. Aqshasyn beker shashady. Sol kúshi men qarjysyn densaýlyǵyna, oı-óresin kóterýge jumsasa, qyz-jigitterdiń bolashaǵy jaman bolmaıdy. Ókinishtisi, túngi saǵat 3-4 bolǵanda jastar klýbtan shyǵyp, tóbelesedi. Qyzdar qyzdarmen tóbelesedi, qyzdar jigitterdi sabaıdy. Keıingi kezde sondaı derek jıilep barady. Osy máseleni zerttep, ata-analarmen jumysty kúsheıtý kerek. Kóbi kolledj stýdenti eken. Ata-anasy «balam, qyzym oqyp júr, bári jaqsy» dep oılaıdy. Zeınetaqy, járdemaqysynan jyryp, balasyna jiberedi. Al olar qalada qydyryp júredi. Sony baqylyp, jumysty jandandyrý kerek», - dedi Berdibek Saparbaev.
Óńir basshysy kez kelgen is-sharanyń nátıjesi bolýyn tapsyrdy. Máselen, «Halyq qaýipsizdigin qamtamasyz etý» jobasy aıasynda jumys júrgizilip, jalpy qylmys 28 paıyzǵa azaıdy. Biraq jastar arasyndaǵy qylmys bıyl 43 paıyzǵa ósti. Al zorlyq 16-dan 23-ke jetti. Ósim bul baǵytta da bar.
«Tóbelesetin jastardyń barlyǵyn 15 kúnge qamaý kerek. Ata-anasyn shaqyrtyp, olardyń aty-jónderin baspasózge jarııalaý kerek. Sol kezde tártip bolady. Ata-ana balasynyń, qoǵamnyń aldynda jaýapkershiligin seziný kerek. Bizde oqý ornyna, bılikke, polıtsııaǵa júk artyp qoıǵan», - dedi B.Saparbaev.
