Qyzdar veterınarııa mamandyǵyn nege tańdaıdy
NUR-SULTAN. QazAqparat - QR Parlament Májilisiniń depýtattary Úkimet basshysynyń atyna saýal joldady, dep habarlaıdy QazAqparat tilshisi.
Depýtat Roman Kımniń aıtýynsha, sońǵy jyldary veterınarııa salasynda biraz reformalar jasaldy. Aýyldy jerlerde jumys isteıtin mamandardyń jalaqysy 25 protsentke kóterildi. Alaıda atalǵan sharalardyń nátıjesi shamaly.
"Ásirese, veterınar mamandardy daıarlaý máselesi ózekti bolyp tur. Búginde aýyldardyń úshten bir bóligi veterınarsyz otyr. Al ondaı mamandar bar bolsa da, qaǵazbasty jumystan shyǵa almaı jatady, ıa bolmasa, múldem kásibı biliktiligine saı kelmeıdi. "Dıplommen aýylǵa" baǵdarlamasy da kútken nátıjeni bermedi. Sebebi jergilikti atqarýshy organdardyń tarapynan qajetti áleýmettik qoldaý sharalary bolmady. Sonyń ishinde arnaıy járdemaqy men baspana máselesi bar. Osylaısha, aýyldaǵy maman tapshylyǵy sozylmaly aýrýǵa aınalyp ketti. Sonyń saldarynan veterınarııa qyzmeti óz mindetin tolyǵymen oryndamaı otyr", - dedi R.Kım.
Onyń sózine qaraǵanda, zertteýler boıynsha sońǵy úsh jylda joǵary oqý oryndary 2 181 veterınar mamandy daıarlap shyqty. Sonyń ishinde 1 388 adam - qyzdar.
"Olardyń kóbisi basqa mamandyqqa túse almaǵasyn veterınarııaǵa tapsyrǵan. Demek, "dıplomdy alsam boldy" degen oımen kelgen. Sóıtip, granttar mamandyqty izdep kelgen adamdarǵa berilip jatqan joq. Ondaı túlekter oqýdy bitirgennen keıin aýylǵa jumys isteýge barmaıdy. Negizi, veterınarııa boıynsha bitirgenderdiń teń jartysy óz mamandyǵy boıynsha jumys istemeıdi. Al osy joldy shyn kóńilmen tańdaǵandar jergilikti jerde kóptegen qıyndyqtarǵa tap bolady. Ol - jalaqynyń tómen bolýy men baspana máselesi. Osylaısha, memlekettik granttardyń sany kóbeıse de, odan keletin paıda shamaly. Bir sózben aıtqanda, bıýdjet aqshasyn jelge shashyp jatyrmyz", - dep atap kórsetti R.Kım.
Osy oraıda depýtattar veterınarııa salasyn damytýǵa qatysty birneshe usynys jasady. Birinshiden, aýyl sharýashylyǵy mamandyqtary boıynsha memlekettik tapsyrysty arttyrý qajet. Ekinshiden, aýylda jerlerde mal men qusty emdeýmen aınalysatyn veterınar mamandardyń jalaqysyna qosymsha aqy tóleý kerek. Úshinshiden, jergilikti atqarýshy organdar jas mamandarǵa barynsha qoldaý jasaýy tıis. Tórtinshiden, depýtattar agroónerkásip keshenine qajetti mamandardy daıarlaý boıynsha memlekettik tapsyrysty qalyptastyrý quziretin QR Aýyl sharýashylyǵy mınıstrligine berýdi usyndy.
