Qyzdar ýnıversıtetiniń stýdentteri jataqhanamen tolyq qamtamasyz etildi
ASTANA. QazAqparat - Bıyl Qazaq memlekettik qyzdar pedagogıkalyq ýnıversıtetine 2 myńǵa jýyq stýdent, 241 magıstrant pen 30 doktorant qabyldanyp, olar 100 paıyz jataqhanamen qamtamasyz etildi. Bul týraly oqý ornynyń resmı ókili Jandar Asan aıtty, dep habarlaıdy QazAqparat tilshisi.
Onyń aıtýynsha, bekitilgen erejege sáıkes jańa oqý jyly bastalarda ıaǵnı, Qyzdar Ýnıversıtetiniń stýdentterin jataqhanaǵa ornalastyrýdyń aldynda bilimgerler tolyqtaı medıtsınalyq tekserýden ótip, ýaqytsha tirkeýge turǵyzyldy. Bul jumystar tamyzdyń 20-31 kúnderi aralyǵynda uıymdastyryldy.
«Medıtsınalyq tekserýler QR Densaýlyq saqtaý mınıstriniń 2018 jylǵy 18 sáýirdegi sanıtarııalyq qaǵıdalaryn bekitý týraly № 175 buıryǵy boıynsha jáne ýnıversıtet rektorynyń 01.03.2018 jylǵy № 95 buıryǵymen bekitilgen «Jataqhanaǵa stýdentterdi ornalastyrý tártibi týraly» erejeniń «Turǵyn úı kelisim-shartyn, úlgi boıynsha bekitilgen ruqsat qaǵazyn, dárigerlik qaraýdan jáne tólem ótkizgennen keıin stýdent buıryq boıynsha bekitilgen jataqhanasyna baryp ornalasady» atty 3.3 tarmaǵymen júrgiziledi», - dep atap ótti Jandar Asan.
Qazaq memlekettik qyzdar pedagogıkalyq ýnıversıtetine zamanaýı qural-jabdyqtarmen qamtamasyz etilgen jeti jataqhana tıesili. Jataqhanadaǵy jalpy oryn sany - 2954. Memlekettik grantta oqıtyn stýdentter úsh mezgil tegin tamaqpen jáne jataqhanamen qamtamasyz etiledi. Bul turǵydan kelgende Qyzdar Ýnıversıteti jataqhanaǵa muqtaj 1-4 kýrs stýdentterin jatyn orynmen qamtamasyz etip otyrǵan elimizdegi birden-bir joǵary oqý orny.
Aıta keteıik, Qyzdar Ýnıversıtetiniń 6 fakýltetindegi 28 kafedra bakalavrıat boıynsha - 43, magıstratýra boıynsha - 23 jáne PhD doktorantýra boıynsha - 4 mamandyq negizinde muǵalimder daıyndaıdy. Sondaı-aq, syrttaı oqý bóliminiń stýdentteri 20 mamandyq boıynsha qashyqtyqtan oqytý tehnologııasyn paıdalanyp, bilim alady. Búginde oqý ornynda jalpy sany 6 myńnan astam stýdent, magıstranttar men doktoranttar oqıdy. Olarǵa 55 ǵylym doktory, 230-dan astam ǵylym kandıdaty men 90-ǵa jýyq PhD doktory men ǵylym magıstri dáris beredi.
