Qyzdar ýnıversıtetiniń ǵalymdary alǵashqy ónertabys patentine ıe boldy

ASTANA. QazAqparat - Qazaq memlekettik qyzdar pedagogıkalyq ýnıversıtetiniń ǵalymdary «YbBiNaFeO5 quramdy vısmýtty - ferrıtti alý joly» atty patentke ıe boldy. Innovatsııalyq ónertabys nanoqurylymdy beıorganıkalyq materıaldy sıntezdep alǵany úshin berilip otyr. Bul týraly oqý ornynyń Baspasóz ortalyǵynyń basshysy Jandar Asan habarlady. 

Onyń aıtýynsha, hımııa ǵylymdarynyń doktory, professor Muhametqalı Mataevtyń jetekshiligimen Qyzdar Ýnıversıtetiniń bir top ǵalymy birneshe jyldan beri Jaratylystaný fakýltetiniń bazasyndaǵy Keshendi hımııa-bıologııalyq ǵylymı-zertteý ortalyǵynda tájirıbe júrgizip keledi. Uzaq jylǵy ǵylymı izdenistiń nátıjesinde olar kún energııasyn túrlendirý qurylǵylaryna magnıttik jartylaı ótkizgish materıaly retinde, spıntronıka, mıkroelektronıka jáne kompıýterlik tehnıka qurylǵylaryna materıal retinde qoldanyla alatyn ónertabysqa qol jetkizip otyr.

Jandar Asannyń aqparatyna súıener bolsaq, bul - Qazaq memlekettik qyzdar pedagogıkalyq ýnıversıtetiniń alǵashqy ónertabys-ınnovatsııalyq patenti. Oqý ornynyń Keshendi hımııa-bıologııalyq ǵylymı-zertteý ortalyǵy ǵylymı, qoǵamdyq jáne basqa da ǵylymmen aınalysatyn uıymdarmen birlese otyryp, ǵylymı jobalardy daıyndaý jáne júzege asyrý jumystaryna qatysady.

Ortalyqtyń jumys isteý baǵyty boıynsha qyzmetkerlerge, ýnıversıtettiń bilim alýshylaryna qyzmet kórsetýge josparlanǵan. Ortalyqtyń ǵylymı-zertteý jumystary hımııa jáne bıologııa kafedralarynyń birneshe ǵylymı baǵyttaryna sáıkes júrgiziledi.