Qyzdar ýnıversıtetine «Ulttyq» statýsy berildi
ASTANA. QazAqparat - Qazaqstan Prezıdenti Nursultan Nazarbaevtyń 2018 jylǵy 25 jeltoqsandaǵy Jarlyǵymen Qazaq memlekettik qyzdar pedagogıkalyq ýnıversıtetine «Ulttyq» mártebesi berildi. Bul týraly ýnıversıtettiń baspasóz ortalyǵynyń jetekshisi Jandar Asan málim etti, dep habarlaıdy QazAqparat tilshisi.
Qazaq memlekettik qyzdar pedagogıkalyq ýnıversıteti elimizdiń oqý oryndary arasynda ózindik dara orny bar bilim ordalarynyń biri. Ol - respýblıkada tek qyzdardan pedagog kadrlar daıarlaıtyn birden-bir joǵary oqý orny. Ýnıversıtet 75 jylǵa jýyq ýaqyt aralyǵynda óziniń qalyptasý jáne damý jolynan ótti. Ult zııalylary qyzmet atqarǵan ulaǵat uıasynda osy ýaqyt aralyǵynda 60 myńnan astam bilikti maman daıarlandy. Aıtýly ǵalymdarymyz túrli ǵylym salalaryna qatysty irgeli zertteý eńbekterin osy ýnıversıtet qabyrǵasynda jazyp, el ıgiligine aınaldyrdy.
Búginde Qazaq memlekettik qyzdar pedagogıkalyq ýnıversıteti bakalavrıat boıynsha - 42, magıstratýra boıynsha - 23, PhD doktorantýra boıynsha 4 mamandyq daıarlaıdy. Oqý ornyndaǵy 6 fakýltettiń 27 kafedrasy pedagog kadrlardy ázirleýdi júzege asyrýda. Al syrttaı oqý bóliminde 20 mamandyq boıynsha qashyqtyqtan oqytý tehnologııasy qoldanysqa engizilgen. Bolashaq pedagog mamandarǵa 41 ǵylym doktory, 193 ǵylym kandıdaty, 22 PhD doktory, 202 ǵylym magıstri bilim beredi.
