Qyzdar ýnıversıtetinde «Sheberlik shyńyna shyǵar jol» kontserti ótedi
ASTANA. QazAqparat - 29 sáýir - Halyqaralyq bı kúni. Dástúr boıynsha, jyl saıyn álemde bı óneriniń sheberleri túrli konkýrstar ótkizip, bul ónerdiń atyn jańǵyrtýda. Ataýly merekege oraı jáne Qyzdar ýnıversıtetiniń 70 jyldyǵy men horeografııa kafedrasynyń 25 jyldyǵyna oraı búgin, 24 sáýir kúni «Sheberlik shyńyna shyǵar jol» atty kontsert ótedi.
Sharanyń uıymdastyrýshysy - Óner jáne mádenıet fakýltetiniń horeografııa kafedrasy.
Qyzdar ýnıversıtetiniń «70 jyldyqqa - 70 shara» aıasynda arnaıy ótetin kontsertte «Saltanat» memlekettik bı ansambli, Qazaq memlekettik qyzdar pedagogıka ýnıversıtetiniń maqtanyshy - Halyqaralyq jáne respýblıkalyq baıqaýlardyń laýreaty «Tomırıs» bı ansambli, Q. Qojamııarov atyndaǵy Memlekettik respýblıkalyq uıǵyr mýzykalyq komedııa teatrynyń «Rýhsará» bıi ansambli, Abaı atyndaǵy opera jáne balet teatry men Seleznov atyndaǵy Almaty horeografııa ýchılışesiniń bıshileri óner kórsetedi.
Sharaǵa sondaı-aq bı óneriniń maıtalmandary, Qyzdar ýnıversıtetiniń túlekteri - QR Halyq ártisi Raýshan Baıseıitova, QR Eńbek sińirgen ártisi Toıǵan Іzim, QR Eńbek sińirgen qaıratkeri, álemge tanymal balerına Quralaı Sarqytbaeva, QR Eńbek sińirgen qaıratkeri, prıma balerına Saýle Rahmetova, QR mádenıet qaıratkeri, Abaı atyndaǵy opera jáne balet teatrynyń jetekshi bıshisi Janel Týkeeva arnaıy shaqyrylyp otyr.
Qyzdar ýnıversıtetiniń Horeografııa kafedrasynyń 25 jyldyǵyna arnalyp otyrǵan shara barysynda atalmysh kafedranyń jetistikteri men qalyptasý joly saralanyp, arnaıy daıyndalǵan beınefılm kórsetiletin bolady. Aıta keteıik, shara búgin 24 sáýir kúni saǵat 14.00-de Almatydaǵy Qazaq memlekettik qyzdar pedagogıkalyq ýnıversıtetinde bastalady.
