Qyzdar ýnıversıtetinde latyn grafıkasyn úıretetin kýrs ashyldy
Oqý ornynyń Biliktilikti jetildirý ortalyǵynyń muryndyq bolýymen uıymdastyrylyp otyrǵan kýrstyń maqsaty - Memleket basshysynyń «Bolashaqqa baǵdar: rýhanı jańǵyrý» maqalasynda kórsetilgen mindetterdi júzege asyrý maqsatynda kýrs qatysýshylaryna latyn grafıkasyna negizdelgen qazaq álipbıin úıretýdiń ońtaıly tehnologııalaryn meńgertý, álipbıdi oqyp, úıretýge qatysty teorııalyq jáne praktıkalyq bilimderin jetildirý.
«Latyn grafıkasyna negizdelgen qazaq álipbıin úıretýdiń ınnovatsııalyq ádisteri» atty kýrs tyńdaýshylary «Qazaqstan Respýblıkasynda bilim berýdi jáne ǵylymdy damytýdyń 2016-2019 jyldarǵa arnalǵan memlekettik baǵdarlamasynyń negizgi qaǵıdalary», «Jańartylǵan bilim berý baǵdarlamasynyń túıindi erekshelikteri», «Rýhanı jańǵyrý» baǵdarlamasynyń baǵyttary», «Jańa qazaq álipbıiniń sońǵy nusqasy: artyqshylyqtary men kemshilikteri, usynystar», «Bilim berý uıymdarynda latyn álipbıin úıretýdi uıymdastyrý kezeńderi, erekshelikteri», «Jańa qazaq álipbıin úıretýdiń nátıjege baǵyttalǵan oqý ádisteri», «Jańa álipbıdi kvest oıyndar arqyly ıgertý», «Jazý daǵdysyn qalyptastyrýdyń ońtaıly tásilderi» jáne «Learning apps, apps Geyser platformalarynda jáne elektrondy oqýlyq kómegimen jańa álipbıdi úıretýdiń tásilderi» atty modýlderdi meńgeredi.
«Latyn grafıkasyn qabyldap bolǵannan keıin ony oqytý máselesi birinshi kezekke qoıyldy. Qyzdar Ýnıversıtetiniń pedagogıkalyq joǵarǵy oqý orny ekendigin eskere otyryp, óz tarapymyzdan bıylǵy oqý jylynan bastap jańa álipbıdi úıretetin mamandardy jáne balabaqsha men orta mektepterge arnalǵan oqýlyqtardy daıyndaý kózdelip otyr. Elimiz boıynsha latyn álipbıine ótý Bilim jáne ǵylym mınıstrliginiń bilim berýdiń barlyq deńgeıinde 2025 jylǵa deıin qazaq tili álipbıin latyn grafıkasyna kóshirý kestesin bekitý týraly buıryǵy boıynsha mekteptiń birinshi synyby jańa álipbı boıynsha 2020 jyldan bastap oqytylmaq. Osyǵan oraı ashylǵan kýrsqa Almaty qalasy men Almaty oblysynyń mektep muǵalimderi men balabaqsha tárbıeshileri, mektepaldy daıarlyq toptarynyń tárbıeshi-muǵalimderi qatysýda», - deıdi Strategııalyq damý jáne halyqaralyq baılanystar jónindegi prorektor Almagúl Qultýmanova.
Onyń aıtýynsha, birneshe kúnge sozylǵan kýrs barysynda qatysýshylar latyn grafıkasyna negizdelgen qazaq álipbıimen oqyp, onyń negizgi ózekti máselelerimen tanysty.
Kýrs ýnıversıtet ǵalymdary qurastyrǵan «Latyn grafıkasyna ótýge baılanysty ınteraktıvti úıretýshi baǵdarlamalar jasaýdyń lıngvıstıkalyq negizderi men mýltımedııalyq tehnologııalary» atty arnaıy baǵdarlama boıynsha júrgizildi. Atalǵan jobanyń baǵdarlamasynda Android, iOS, Windows platformasyndaǵy lıngvıstıkalyq sózdik, latyn árpine avtomatty túrde aýdarma jasaıtyn arnaıy saıt pen dybys jáne beıne materıaldarymen súıemeldengen sandyq elektrondy oqýlaqtar bar. Sonymen qatar, latyn grafıkasyn úıretý úshin balalarǵa arnalǵan oıyn baǵdarlamalary men mobıldi qosymshalar engizilgen.
Alǵash ret uıymdastyrylyp otyrǵan kýrsty fılologııa ǵylymdarynyń doktory, professor T. Ermekova, tehnıka ǵylymdarynyń kandıdaty, dotsent G. Salǵaraeva, fılologııa ǵylymdarynyń kandıdaty S. Odanova, fılologııa ǵylymdarynyń kandıdaty Ǵ. Shoıbekova, PhD N. Jańabaeva jáne ǵylym magıstri J. Bazaeva ótkizdi.
«Jańa zamannyń jastary ózgermeli ýaqytta ómir súrýge qabiletti bolyp qana qoımaı, oqıǵalar men úderisterdiń ortasynda, kósh basynda bolýy tıis. Bul tereń túısine bilgenge básekelestikke aparar joldyń basy, ulttyq kodymyzdy kózdiń qarashyǵyndaı saqtaýdyń negizi. Qazirgi memleketimizge ultty uıystyra alatyn, tyń baǵyttaǵy rýhanı aǵym kerek. Latyn áripin engizýdiń basty ózegi de osynda jatyr. Sondyqtan da jańa álipbı elimiz úshin qajetti, ýaqyt talabynan týyndap otyrǵan jańa atrıbýt, asa mańyzdy faktor dep sanaımyz. Bul turǵyda osy taqilettes kýrstar jańa álipbıdi úıretýde úlken septigin tıgizbek», - dep atap ótti Qyzdar ýnıversıteti baspasóz jáne qoǵammen baılanys bóliminiń basshysy Jandar Asan.
