Qyzdar ýnıversıtetinde «Bir ýnıversıtet - bir kitap» jobasy bastaý aldy
ASTANA. QazAqparat - «Rýhanı jańǵyrý» baǵdarlamasy aıasynda Qazaq memlekettik qyzdar pedagogıkalyq ýnıversıtetinde «Bir ýnıversıtet - bir kitap» aktsııasy bastaldy, dep habarlaıdy QazAqparat tilshisi atalǵan oqý ornynyń baspasóz jáne qoǵammen baılanys bólimine silteme jasap.
Memleket basshysynyń baǵdarlamalyq maqalasyn júzege asyrý maqsatynda uıymdastyrylǵan áleýmettik-mádenı jobanyń maqsaty - qazaq jáne álem ádebıetin nasıhattaý, tarıhı-mádenı hám rýhanı muramyzdy saqtaý, óskeleń urpaqty otanshyldyqqa ári ónegelilikke tárbıeleý.
«Elbasy Nursultan Nazarbaevtyń «Óziniń bıik, taza rýhanı qasıetimen kitap - mádenıet pen rýhanııatty qorǵaýda teńdesi joq qarý bolyp tabylady. Kitap - adamzat balasyna aǵartý hám bilim syılaı beredi. Kitap betterinde adamzat tirshiliginiń san qıly qupııalary saqtalǵan. Kitap - eń sabyrly ustaz. Tek kitap qana qaıyrymdylyq pen qanypezerliktiń, aqıqat pen jalǵannyń arajigin aınytpaı tanyp bilýge úıretedi» degen sózi bar. Rasynda da, rýhanı qundylyqtardy jete meńgergen, zııatkerlik áleýeti bıik, mádenıeti joǵary azamattary kóp eldiń bolashaǵy - baıandy, erteńi - eren bolatyny ómirdiń ózi kórsetip otyr. «Bir ýnıversıtet - bir kitap» aktsııasynyń maqsaty da osyǵan saıady», - dedi Qyzdar ýnıversıteti Baspasóz jáne qoǵammen baılanys bóliminiń basshysy Jandar Asan.
«Bir ýnıversıtet - bir kitap» aktsııasy aıasynda fleshbýk, oqý orny stýdentteriniń arasynda esse baıqaýy, «Jyrym sensiń, týǵan el!» jas aqyndar saıysy, Qazaqstannyń qasıetti jerlerine ǵylymı-tanymdyq ekspedıtsııalar men saıahattar, «Ulttyq kod - halyq tektiligi men rýhanı sanasynyń negizi» atty treıler saıysy, «Qyz tárbıesi - qundylyqtyń kilti» taqyrybynda serııaly basqosýlar men «Zamanaýı mádenı ortadaǵy urpaq tárbıesi» TED-X-alańy uıymdastyryldy. Sonymen qatar, aldaǵy ýaqytta túrli taqyrypta breın-rıng, festıval, kezdesýler, shyǵarmashylyq jármeńke jáne qaıyrymdylyq aktsııalardy ótkizý josparlanyp otyr. «Qyzdar Ýnıversıteti» gazetinen «Ýnıversıtet stýdenti oqýy tıis 100 kitap» arnaıy aıdary ashylyp, onda qazaq ján shetel jazýshylarynyń oqyrman tarapynan joǵary baǵalanǵan ádebı týyndylary berilip keledi. Atalǵan sharalardyń qaı-qaısysy da ult bolashaǵy - jastardyń, jalpy qoǵamdyq sanany jańǵyrtýǵa baǵyttalǵan.
