Qyzdar ýnıversıteti Jazǵy daıyndyq mektebin bıyl da jalǵastyrady
ASTANA. QazAqparat - Qazaq memlekettik qyzdar pedagogıkalyq ýnıversıteti bıyl da «Jazǵy daıyndyq mektebi» jumysyn jalǵastyrmaq. Jazǵy mektep jumysy maýsym aıynyń 5-30 aralyǵynda júrgiziletin bolady, dep habarlaıdy QazAqparat.
Atalǵan bilim ordasynyń habarlaýynsha, jazǵy mektepti uıymdastyrýdaǵy basty maqsat - Almaty oblysynyń shalǵaı aýdandaryndaǵy áleýmettik jaǵdaıy tómen otbasylardyń 10 synypty aıaqtap, 11 synypqa kóshken oqýshy qyzdaryn UBT-nyń jańa formatymen mindetti jáne tańdaý pánderi boıynsha daıyndaý.
Eske sala keteıik, «Jazǵy daıyndyq mektebi» atty áleýmettik joba ótken 2016 jyly alǵash ret Almaty oblysy ákimi A.Batalovtyń qoldaýymen bastaý alyp, Almaty oblysyndaǵy áleýmettik jaǵdaıy tómen otbasylardyń qyzdaryna arnalyp, qoldaý kórsetý maqsatynda uıymdastyrylǵan edi.
Ótken jyly bul joba boıynsha Jazǵy mektepte 86 oqýshy qyz bilim alsa, bıylǵy jyly 200-den astam oqýshy qyz qatysýǵa nıet bildirip, tirkelip otyr. Tirkeý elektrondy túrde 29 mamyrǵa deıin júrgizildi. Jazǵy daıyndyq mektebine jetim, jartylaı jetim, kópbalaly otbasy, ata-anasy múgedek, aýyl mektebiniń oqýshylary qabyldandy. Ótinish bildirýshilerdiń basym bóligi - Almaty qalasynyń jáne oblysynyń oqýshylary.
Oqýshylarǵa bir aı boıy ýnıversıtettiń bilikti oqytýshy-professorlar quramy sabaq berep, bilimderin shyńdaıtyn bolady. Oqý kýrsy aıasynda qyzdardy ásem qala Almatynyń kórikti jerlerin aralatý, ýnıversıtetishilik nebir qyzyqty is-sharalarǵa qatystyrý, teatrlar men qalanyń túrli mádenı sharalaryna aparý kózdelgen. Oqý ornyndaǵy alty fakýltet boıynsha ár kúnge «Ashyq esik» kúnin de ótkizý josparlanýda. Sonymen qatar, qyzdar úshin Almaty qalasyndaǵy iri joǵary oqý oryndarynyń (ál-Farabı atyndaǵy QazUÝ, S.Asfendııarov atyndaǵy medıtsınalyq ýnıversıtet, T.Júrgenov atyndaǵy óner Akademııasy jáne t.b.) tynys-tirshiligimen tanystyrý ekskýrsııasy uıymdastyrylady.
Maýsym aıynyń sońyna deıin jalǵasatyn oqý tegin júrgiziletin bolady. Mektep oqýshylaryna Qyzdar ýnıversıtetiniń jataqhanasynan tegin oryn da qarastyrylǵan. Oqý barysynda qyzdar ýnıversıtetke qarasty Ǵylymı kitaphanany, «Aqqý» basseıni men trenajer zaldaryn da qoldanýǵa múmkindik alady.
