Qyzdar ýnıversıteti jas mamandar legin daıarlady
ASTANA. QazAqparat - Qazaq memlekettik qyzdar pedagogıkalyq ýnıversıteti otandyq bilim-ǵylym salasyn jas mamandarmen tolyqtyrdy. Búgin bakalavrıat pen magıstratýrany támamdaǵan túlekterge dıplom tabystaý saltanatty is-sharasy ótkizildi, dep habarlady oqý ordasynyń baspasóz qyzmetinen.
Qyzdar ýnıversıtetiniń rektory D.Nóketaeva: «Aıaýly meniń qyzdarym! Qyzdar ýnıversıtetiniń túlekteri! Dana Abaı babamyz «Adamnyń adamgershiligi jaqsy ustazdan bolady» deıdi. Adamgershilik qasıetke ıe, bilimdi, zeıindi shákirtterińizdiń «Meniń alǵashqy ustazym!», «Meni oqytqan ustaz!», «Meniń súıikti muǵalimim!» degen maqtanyshty sózderin árdaıym estip júrýlerińizge tilektespin! Ustaz mereıi shákirt jetistigimen ólshenedi. Mereılerińiz ústem bolsyn! Eńbek joldaryńyz ashyq bolsyn! Mansap baspaldaqtaryńyz órleı bersin! Aq jol, jas maman!», - deı kele keshe ǵana bilikti maman atanýǵa degen asqaq armanmen Qyzdar ýnıversıtetiniń tabaldyryǵyn attaǵan, mine, araǵa tórt jyl salyp, zamanaýı jas kadr atanyp otyrǵan óziniń jas áriptesterine quttyqtaý lebizin arnap, magıstrlik jáne bakalavrlyq dıplomdaryn tabystady.
Bıylǵy oqý jylynda Qyzdar ýnıversıtetin bakalavrıat boıynsha 2 myńǵa jýyq túlek, 182 ǵylym magıstri aıaqtap otyr. Al bakalavrdy támamdaǵan stýdentteriniń qataryna Mıssıssıpı memlekettik ýnıversıtetin bitirip, eki dıplomdy maman atanǵan jańa stýdentter legi qosylyp otyr. «Shetel tili: eki shetel tili» mamandyǵy boıynsha oqyǵan Janargúl Hamıtova, Іńkár Búrkitova, Elına De, Dına Abdrahmanova, sondaı-aq, «Pedagogıka jáne psıhologııa» mamandyǵy boıynsha bilim alǵan Aıǵanym Abdeldınova, «Informatıka» mamandyǵy boıynsha bitirgen Botagóz Sábıt Qyzdar ýnıversıtetiniń eki dıplomdy túlekteriniń qataryn tolyqtyrdy.
