Qyzdar smartfonmen bilim alady, uldar oıyn oınaıdy - zertteý
ASTANA. QazAqparat - Qoǵamda tehnologııa salasy kóbine er adamdarǵa arnalǵany aıtylyp, IT salasynda júrgen qyzdarǵa oǵash qaraıtyn úderis bar. Rasynda, IT salasyndaǵy áıelderge degen kózqaras áli de bolsa tómen. Alaıda, The New York Times basylymynyń jazýynsha, túrli zertteýler nátıjesinde ǵalymdar ul balalar qolyna mobıldi telefon, planshet alsa, oıyn oınaıtynyn, al qyzdar qolyna túsken tehnologııany bilim alý úshin paıdalanatynyn anyqtaǵan.
«Osy aptada jarııalanǵan zertteýge 5-17 jas aralyǵyndaǵy 2900 qyz ben ul bala qatysqan. Mamandardyń aıtýynsha, qyzdar smatfon, planshet, noýtbýk pen oıyn qurylǵylaryn paıdalanǵanda uldardan esh kem túspegen. Sonymen qatar, ǵalymdar anyqtaǵandaı, uldar bul qurylǵylardy kóbine oıyn oınaý úshin paıdalansa, qyzdar tehnologııalardy jańa bilimdi meńgerý úshin qoldanǵan», - dep jazady basylym.
Avtordyń aıtýynsha, er balalardyń 81 paıyzy oıyn oınasa, qyzdardyń 72 paıyzy jańa bilim meńgergen. Sonymen qatar qyzdar uldarǵa qaraǵanda qolyndaǵy tehnologııalardan kóbirek kitap oqyǵan (qyzdar - 40 paıyz, uldar 28 paıyz ).
