Qyzdar pedagogıkalyq ýnıversıteti múgedek balanyń emine qarajat jınap berdi
Qaıyrymdylyq balynan jáne aýktsıonnan túsken qarajat I-toptaǵy múgedek Aısultan Asylhannyń emine jumsalady. 2015 jyly dúnıege kelgen búldirshin mı isigi, kórý nervisiniń atrofııasy, epılepsııa jáne tserebraldy sal aýrýyna shaldyqqan.
Tuńǵysh ret uıymdastyrylǵan ıgi shara jastardy bekzat ónerge tartý arqyly olardy joǵary mádenıettilikke, ınabattylyq pen qaıyrymdylyqqa baýlýdy maqsat tutyp otyr. Oqý ornynyń ujymy osy joba arqyly qoǵamda «Almaty – izgi ister qalasy» túsinigin qalyptastyrýdy jáne ony naqty iske asyrýdy kózdeıdi. Ońtústik astananyń elimizdiń mádenı ortalyǵy retindegi ımıdjin odan ármen kóterýge septesetin shara shyǵarmashylyq áleýeti joǵary talantty jastardy anyqtaýǵa da úles qospaq.
Qysqy ertegi jelisimen uıymdastyrylǵan shara 75 juptyń oryndaýyndaǵy yrǵaqty valspen ashyldy. Baldyń debıýtanty atanǵan Qyzdar ýnıversıtetiniń stýdentteri men QR Ulttyq Qaýipsizdik komıtetiniń Shekara qyzmeti akademııasynyń kýrsanttary klassıkalyq bılerdi joǵary deńgeıde oryndap kópshiliktiń ystyq yqylasyna bólendi.
Oqý ornynyń rektory Gaýhar Aldambergenova jınalǵandardy mereıtoımen quttyqtap, ıgilikti iske qoldaý kórsetken abzal jandarǵa rızashylyǵyn jetkizdi. Sonymen qatar ol ýnıversıtettiń ózindik ereksheligine toqtalyp ótti.
«Ekinshi dúnıejúzilik soǵystyń alasapyran ýaqtysynda irgetasy qalanǵan bul bilim ordasynyń Qazaqstannyń pedagog kadrlaryn daıarlaýdaǵy alatyn orny aıryqsha úlken. Sebebi osy jyldar aralyǵynda oqý ornyn 60 myńnan astam túlek bitirip shyqty. Olar Otanymyzdyń túkpir-túkpirinde eńbek etip, saýatty da bilimdi urpaqty daıarlaýǵa zor eńbek sińirdi. Ult pedagogıkasynyń damýy jolynda qajyrly qyzmet atqardy. Búginde álemde tek qana qyzdar bilim alatyn joǵary oqý oryndary saýsaqpen sanarlyqtaı. Osy oraıda biregeı bilim ordasy retinde elimiz ben álemge keńinen tanymal bolǵan oqý orny – «Qyzdar ýnıversıteti» degen ózindik brendin qalyptastyrdy. Bizdiń basty maqsatymyz – osy ýaqytqa deıin qol jetkizgen tabystardy eseleı túsý, qazynaly qarashańyraqty shyqqan bıiginen túsirmeý», – dedi Gaýhar Aldambergenova.
Jıynda Bilim jáne ǵylym mınıstri Ashat Aımaǵambetovtiń quttyqtaý haty oqyldy. Al Almaty qalasynyń ákimi Baqytjan Saǵyntaevtyń ýnıversıtet ujymy men stýdentterine joldaǵan izgi lebizin Almaty qalalyq Qoǵamdyq damý basqarmasy basshysynyń orynbasary Aıdar Esenbekov jetkizdi.
Shara sheńberinde pedagogıkalyq oqý ornynyń oqytýshylary men stýdentteriniń shyǵarmashylyq jumystary men óner týyndylary aýktsıonǵa qoıyldy. Qaıyrymdylyq balynan jáne aýktsıonnan túsken qarajat I-toptaǵy múgedek Aısultan Asylhan esimdi sábıdiń emine jumsalady. Shara barysynda túrli uıym ókilderi men azamattar sábıdiń em-domyna qajetti qarajatty aýdaryp jatty.
Mereıtoılyq rásimniń ekinshi bólimi «75 jyl: danalyq pen daralyq joly» atty derekti fılmmen ashyldy. Kıno týyndyda Qyzdar ýnıversıtetiniń ótkeni men búgini keńinen kórinis tapqan. Jıynda ýnıversıtettiń bilim, ǵylym, óner jáne sport salasy boıynsha damýyna sińirgen zor eńbegi úshin bir top oqytýshylar Bilim jáne ǵylym mınıstrligi men Almaty qalasynyń ákiminiń «Qurmet gramotalarymen» marapattaldy. Al Qazaqstannyń salalyq bilim jáne ǵylym kásipodaǵy uıymy professor-oqytýshylar quramyna shıpajaılyq-saýyqtyrý joldamalaryn tabystady. Sonymen qatar jıynda bir top ustazǵa «Eńbek ardageri» medali jáne «Bilim jáne ǵylym qyzmetkerleriniń kásipodaǵyna sińirgen eńbegi úshin» belgisi tabystaldy. Shara barysynda ýnıversıtet túlekteri, tanymal óner maıtalmandary Tamara Asar, Marjan Arapbaeva men Uljan Aınaqulovaǵa ýnıversıtettiń «Qurmetti professor» ataǵy berildi.
Taǵylymǵa toly oqý ornynyń mereıtoıynyń sońynda ýnıversıtet tarıhynan syr shertetin teatrlandyrylǵan kórinis kópshilik nazaryna usynylyp, estrada juldyzdarynyń qatysýymen gala-kontsertke ulasty.
Búginde ýnıversıtet álemniń 70-ke jýyq joǵary oqý ornymen yntymaqtastyq baılanys ornatqan. Onyń ishinde AQSh-tyń Mıssısıpı alqaby memlekettik ýnıversıteti, Ulybrıtanııanyń Western international sollege oqý ornymen, Polshanyń Katovıtsahtaǵy Sılez ýnıversıtetimen jáne Túrkııanyń Nııde Ómer Halısdemır ýnıversıtetimen qosdıplomdy bilim berý baǵdarlamasy sátti júzege asyp keledi.
Eske sala ketsek, bilim ordasyna Qazaqstannyń Tuńǵysh Prezıdenti Nursultan Nazarbaevtyń 2018 jylǵy 25 jeltoqsandaǵy Jarlyǵymen «Ulttyq» mártebesi berilgen.
