Qyz zorlamaq bolǵan kúdiktini qolǵa túsirgen áskerı qyzmetker marapattaldy
AQTÓBE. QazAqparat – Oblystyq polıtsııa departamentiniń bastyǵy 66/55 áskerı bóliminiń jetekshi mamany Andreı Petrovqa alǵys hat tapsyrdy, dep habarlaıdy QazAqparat tilshisi.
Aqtóbede «Batys» óńirlik qolbasshylyǵyna qarasty 66/55 áskerı bóliminiń jetekshi mamany Andreı Petrov qyzdy zorlyq bolǵan adamdy qolǵa túsirdi. Oqıǵa 15 maýsym kúni saǵat 03:00-de boldy. Andreı Petrov óz páteriniń balkonyna shyqqan kezde kómekke shaqyrǵan áıeldiń daýysyn estıdi. Syrtqa júgirip shyqqan ol butalardyń arasynda áıelge zorlyq-zombylyq kórsetip jatqan er adamdy kóredi. Birden onyń qolyn qaıyryp, shetke ıterip jiberedi. Osy qylmystyń kýágeri aqtóbelik Tolǵanaı Lesbaeva vıdeojazbaǵa bárin túsirip alyp, polıtsııaǵa qońyraý shalyp, kómekke shaqyrǵan. Qashyp ketpekke árekettengen kezinde jibermeı, ustap turǵan. Sot kúdiktini kináli dep taýyp, 5 jylǵa bas bostandyǵynan aıyrdy. Búgin oblystyq Polıtsııa departamentiniń bastysy Atyǵaı Arystanov eki qutqarýshyǵa alǵysyn bildirdi.
«Batyldyq tanytyp, kúdiktini ustaýǵa kómek kórsettińiz. Mundaı erlik óskeleń urpaqqa úlgi. Polıtsııaǵa kómektesip, bir adamnyń ómirin saqtap qalǵan sizderge alǵys aıtamyz», - dep atap ótti oblystyq polıtsııa departamenti bastyǵy A.Arystanov.
Qyraǵylyq pen batyl is-áreketi úshin Aqtóbe oblysy PD bastyǵy Atyǵaı Arystanov 66/55 áskerı bóliminiń jetekshi mamany Andreı Petrovqa jáne kýáger Tolǵanaı Lesbaevaǵa saltanatty túrde alǵys hatty tabystady. Andreı Petrov – Muǵaljar aýdany, Jem qalasynyń týmasy. Ulttyq ulanda 2017 jyldan beri qyzmet etedi.
«Bul – erlik emes. Kez kelgen adam osylaı jasar edi. Kómekke shaqyrǵan adamǵa qol ushyn berý – er azamattyń boryshy», – deıdi jetekshi maman A. Petrov.
