Qyz zorlaǵany úshin sottalǵan jolserikter jumystan qýyldy
NUR-SULTAN. QazAqparat - «Nur Sultan – Aqtóbe» baǵytyndaǵy jolaýshylar poıyzynda bolǵan qyz zorlaý oqıǵasy boıynsha «Jolaýshylar tasymaly» AQ túsinik berdi, dep habarlaıdy QazAqparat kompanııanyń baspasóz qyzmetine silteme jasap.
«Qazaqstan Respýblıkasynyń zańnamasyna sáıkes, jumys berýshiniń bastamasy boıynsha kórsetilgen poıyz jolseriktermen eńbek qatynasy úzildi. Kompanııa zorlaý faktilerine jol berilmeýi tıis ekenin málimdeıdi jáne osyndaı áreketterdi aıyptaıdy. Sondaı-aq, atalǵan oqıǵa oryn alǵan sátten bastap osyndaı jaǵdaılarǵa jol bermeý jóninde kompanııanyń barlyq qyzmetkerlerine nusqaýlyq berildi. Qyzmetkerlerdiń medıtsınalyq tekseristen ótýine, sonyń ishinde psıhologtar men narkolog-dárigerlerdiń qorytyndylaryn alýyna qosymsha tekserister júrgizildi» delingen habarlamada.
Sonymen qatar, kompanııada jolserikter úshin psıholog kabınetterin ashý josparlanyp otyr. Ol 2020 jyly jumysyn bastaıdy.
Odan bólek, servıstik personal moraldyq-etıkalyq normalar boıynsha quzyrly mamandardyń qatysýmen kezekten tys attestatsııadan ótedi.
Eske sala keteıik, búgin «Nur Sultan – Aqtóbe» poıyzynda jolaýshy qyzdy zorlaǵan jolserikterge qatysty sot úkimi shyqqan bolatyn.
