Qyz zorlady degen kúdikti Balqash qalasynyń eki turǵyny tutqyndaldy
QARAǴANDY. QazAqparat - Balqash qalasyndaǵy toptasyp qyz zorlaǵan atyshýly iske qatysy bar eki kúdikti azamat ustalyp, oqshaýlaǵyshqa qamaldy, dep habarlaıdy «QazAqparat» HAA tilshisi.
Advokat Aıman Omarovanyń málimdeýinshe, qorǵaýyndaǵy Nurgúl Qusylbekova ekeýi zorlaýǵa qatysy bolýy múmkin eki azamattyń ustalýyna qol jetkizgen. Olarǵa qatysty eki aı merzimge «kúzetpen ustaý» bultartpaý sharalary taǵaıyndaldy.
«Biz qolda bar dálelderdi kórsete otyryp, shý shyǵaryp, baspasóz máslıhatyn ótkizgennen keıin iske prokýratýra nazar aýdara bastady. Kúdiktiler ustaldy, qazirgi ýaqytta qylmystyq is materıaldarymen tanysý júrip jatyr jáne jaqyn arada is sotqa beriledi», - dedi advokat Aıman Omarova.
Aıta keteıik, 2016 jyldyń tamyz aıynda Nurgúl Qusylbekovanyń polıtsııa bólimshesinde málimdegenindeı, Balqash qalasynyń eki turǵyny ony beıit basyna aparyp, qorlaǵan. Olar ony qabir qazýǵa májbúrlep, kúrekpen uryp-soqqan. Qylmystyq is birneshe ret toqtatylyp, kúdiktiler tutqynǵa alynbaǵan. Tabandy túrde polıtsııa qyzmetine júgingeni úshin jábirleýshilerdiń kek qaıtarýynan qoryqqan Nurgúl Balqashtan ketip, Temirtaýda páter jaldap turady.
