«Qyz Jibektiń» rejısseri Sultan Qojyqovtyń týǵanyna 100 jyl toldy
Shara barysynda ataqty rejısserdiń týǵan-týystary, kınematograftar jáne «Qazaqfılm» kınostýdııasynyń ujymy estelikterin bólisti.
«Memkınoǵa taqyryptyq jospardy bekitý úshin Máskeýge barǵan kezekti saparynda burynǵy kınostýdııa basshysy Kamal Smaıylovqa usynylǵan stsenarıılerdiń birin bekitpedi. Sodan memlekettik komıtettiń bas redaktoryn Kamal Seıtjanuly oǵan basqa, neǵurlym qolaıly stsenarıımen almastyrýǵa ýaqyt berýge kóndirdi. Almatyǵa oralyp Ǵabıt Músirepovke qońyraý shalyp, «Qyz Jibek» pesasyn kınostsenarııge aınaldyrýdy ótindi. Ǵ.Músirepov bir aı ishinde Kamal Smaıylovtyń tapsyrmasyn oryndady. Osylaısha stsenarıı qutqarylyp, keıinnen ulttyq kınoshedevrge aınaldy»,- deıdi rejısser Bolat Shárip.
Kórnekti rejısserdiń mereıtoıyna arnalǵan is-shara Sultan-Ahmet Qojyqov atyndaǵy №39 mamandandyrylǵan lıtseıdiń qabyrǵasynda jalǵasty.
Lıtseı oqýshylary shyǵarmashylyq kesh uıymdastyryp, qonaqtarǵa mereıtoı ıesiniń ómiri men shyǵarmashylyǵynan teatrlandyrylǵan qoıylym usyndy.
S.Qojyqov 1923 jyly 10 naýryz kúni Taraz jerinde dúnıege kelgen.
Balalyq shaǵynda sýret salýmen áýestengen ol VGIK-tiń rejısserlik fakýltetine oqýǵa túsedi. Shyǵarmashylyq jolyn qazaq drama teatrynyń sýretshi-bezendirýshisi retinde 1942 jyly bastaǵan.
Bul kezde ol 18 jasta ǵana bolatyn. 19 jasynda «Eńlik-Kebek» spektaklin bezendirdi.
1941 jyly soǵysqa attanǵan ol respýblıka úkimetiniń shaqyrýymen tez arada keri oralyp, Máskeýden Almatyǵa kóshirilgen birikken ortalyq kınostýdııada kınosýretshilik kásibin bastaıdy.
Qojyqov áıgili rejısser Grıgorıı Roshal túsirgen «Abaı áni» fılmin jasaýǵa, ózge de alǵashqy qazaq kınolaryna tikeleı atsalysqan.
Sultan Qojyqovtyń alǵashqy táýelsiz týyndysy - «Ana men bala», keıinirek «Biz Jetisýdanbyz» kartınasyn túsirdi.
Sultan Qojyqovtyń esimin dúıim jurt «Qyz Jibekpen» baılanystyrýy zańdylyq.
Ol - osy kartınany dúnıege alyp kelgen rejısser. «Qyz Jibek» lentasynyń premerasyna bıyl 50 jyl toldy.
