«Qyz Jibek» operasy ashyq aspan astynda qoıylady
ASTANA. QazAqparat - EKSPO-2017 kórmesiniń mádenı baǵdarlamasy sheńberinde ashyq aspan astyndaǵy spektaklder qoıylady. Bul týraly Mádenıet jáne sport mınıstri Arystanbek Muhamedıuly málim etti, dep habarlaıdy QazAqparat.
«15-16 maýsymda Beıbitshilik jáne kelisim saraıynyń aldynda elorda turǵyndary men qonaqtary úshin Dj. Verdıdiń «Aıda» operasynyń qoıylymy ótedi. Astananyń kórnekti nyshandarynyń biri - Pıramıda ǵımaraty shoý elementterimen jáne arnaıy otshashýmen ótetin orasan zor qoıylymnyń tabıǵı dekoratsııasyna aınalady. Kórermender merekelik atmosferany Pıramıdaǵa jaqyndaǵan sátten-aq sezinetin bolady. Salmaqty sáýlet qurylymynyń eteginde aq boz at mingen shabarmandar da, alyp beıneınstallıatsııa da úılesimdi kórinis tabady»,-dedi mınıstr jýrnalısterge arnalǵan baspasóz máslıhatynda.
Mınıstrdiń aqparatyna súıensek, 25 maýsymda mınıstrlik taǵy bir aýqymdy, óte tanymal jáne kúrdeli jobanyń biri -Lıýdvıg Mınkýstyń «Don Kıhot» baletin usynady.
Spektakldiń qoıýshy horeografy - Reseıdiń Halyq artısi, «Astana Opera» baletiniń kórkemdik jetekshisi Altynaı Asylmuratova. Qoıýshy dırıjeri - Arman Orazǵalıev, qoıýshy sýretshisi - EtsıoFrıdjerıo (Italııa), kostıýmder boıynsha sýretshi - Franka Skýarchapıno (Itaplııa).
«Sonymen birge, qazaqtyń mýzykalyq murasyn nasıhattaý maqsatynda 14 shildede E. Brýsılovskııdiń «Qyz Jibek» operasy qoıylady, bul joba da aıryqsha aýqymdy bolady, ol da Beıbitshilik jáne Kelisim saraıynyń aldynda kórsetiledi dep kútilýde»,-dedi mınıstr.
