Qyz urlap, ata-anasynan aqsha talap etpek bolypty - aptalyq brıfıng
ASTANA. Sáýirdiń 28-i. QazAqparat /Aıdar Ospanalıev/ - Ońtústik Qazaqstan oblysynyń Maqtaaral aýdanynda jasalǵan qaraqshylyq áreket áshkerelendi. Oqıǵanyń mán-jaıymen búgin jýrnalıstermen bolǵan brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov tanystyrdy,
dep habarlaıdy QazAqparat.
Onyń aıtýynsha, betperde kıgen belgisiz bireýler aýdandaǵy kompanııalardyń biriniń ǵımaratyna kirip kelip, qarý kezenip, dıspetcher men eseptegish-operatordy soqqyǵa jyqqan. Sóıtip qaraqshylar 1,5 mıllıon teńgeni alyp ketken. «Keshendi júrgizilgen izdeý sharalarynyń barysynda jergilikti 4 turǵyn ustalyp, olar ózderi jasaǵan áreketterin moıyndady. Osy ýaqytta olardyń aımaqtaǵy ózge de qylmystarǵa qatystylyqtary tekserilýde», dedi departament bastyǵy.
Sondaı-aq onyń málimetterine qaraǵanda, Batys Qazaqstan oblysyna qarasty Aqsaı aýdanynyń polıtsııa organdaryna 9 jasar qyzdyń ata-anasy kelip, qyzdarynyń mektepke ketken soń qaıta oralmaǵandyǵyn aıtyp, shaǵymdanǵan. «Tekserý jumystarynyń barysynda anyqtalǵanyndaı qyz bala osy kúni mektepke múldem kelmegen. Al kelesi kúni, ıaǵnı sáýirdiń 23-inde jergilikti 30 jasar azamat pen onyń sybaılasy ustaldy. Olar ata-anasynan aqsha talap etý maqsatynda qyzdy Oral qalasyndaǵy jaldamaly páterde ustap otyrypty», dedi departament bastyǵy.
