Qyz-kelinshekter jumys isteıtin bilim, densaýlyq saqtaý, mádenıet salalaryndaǵy jalaqyny kóterý qajet - senator Q. Aıtahanuly
ASTANA. 21 qarasha. QazAqparat - Qyz-kelinshekter jumys isteıtin bilim, densaýlyq saqtaý, mádenıet salalaryndaǵy jalaqyny kóterý qajet. Bul týraly búgin Parlament Senatynyń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zań jobasyn talqylaý barysynda depýtat Qýanysh Aıtahanuly osylaı málim etti.
«2014 jyl - Elbasy úndeýinen týyndaıtyn zeınetaqy reformasyn iske asyratyn alǵashqy jyl. Áıelderdiń zeınetkerlik jasy uzaratyn 2018 jyl da alys emes. Sondyqtan Úkimet osy máselelerdi qazirden bastap tııanaqtap, josparly túrde sheshýdi qolǵa alýy kerek. Máselen, zeınetaqy týraly zańǵa sáıkes, jumys istemeıtin analardyń jas balalaryn kútip-baǵýyna, biraq árbir bala úshin 3 jasqa tolǵannan aspaıtyn jalpy jıyntyǵy 12 jyl shegindegi ýaqyt eńbek ótiline esepteledi dep aıtylǵan. Alaıda, balany baqqan ýaqyt esepke alynǵanymen, osy merzim ishinde jınaqtaýshy zeınetaqy qoryna qarjy túspeıdi. Bul máseleni qalaı sheshýimiz kerek?» - deıdi senator. Onyń aıtýynsha, osy baǵyttaǵy eń basty mindet - áıelderdiń zeınetaqy jınaqtaýshy qoryna salynatyn qarjy kólemin arttyrý. «Negizinen qyz-kelinshekter jumys isteıtin bilim, densaýlyq saqtaý, mádenıet salalaryndaǵy eńbekaqylardy kóterý qajet. Áıelder jumys isteıtin óndiris salalaryna basymdyq berip, jańa jumys oryndaryn ashýymyz, áıelderdiń kásipkerlikpen shuǵyldanýyna barynsha jaǵdaı jasaýymyz kerek», - degen senator Q.Aıtahanuly elimizde ózin-ózi jumyspen qamtamasyz etýshiler sany 3 mln.-nan asatynyn, olardyń basym kópshiligi qyz-kelinshekter ekenin alǵa tartty. Depýtattyń paıymynsha, olardyń basym kópshiligi jumyspen, kásipkerlikpen qamtamasyz etilse, bıýdjetke tek salyq esebinen 150 mlrd. teńge kiris túsetin edi.
