Qyz balany qaǵyp ketken júrgizýshi ustaldy
ALMATY. QazAqparat - Almatyda qyz balany qaǵyp, oqıǵa ornynda qaldyryp ketken júrgizýshi ustaldy, dep habarlaıdy QazAqparat tilshisi.
Jol oqıǵasy 8-jeltoqsan kúni keshke bolǵan. 11 jastaǵy qyz bala qurbysymen Dostyq kóshesin baǵdarsham tusynda kesip ótip bara jatqan. Sol sátte qara tústi kólik balany qaǵyp ketti.
Balalar kóliktiń tek túsin ǵana baıqap qalǵan.
«Bizde tek qana qara tústi kólik ekeni ǵana belgili boldy. Polıtsııa kólikti tabý úshin birqatar keshendi tekserý sharalaryn júrgizdi. Kóshedegi beınebaqylaý kameralaryndaǵy jazbalar tekserildi. Osy jumystardyń arqasynda «Aýdı» kóliginiń ıesi 51 jastaǵy áıel ustaldy. Áıel basynda óziniń qylmysqa qatysy joqtyǵyn aıtyp aqtalyp kelgen. Biraq kóldeneń tartylǵan dálelderden soń istegenin moıyndady», - dedi qalalyq ІІD jergilikti polıtsııa qyzmetiniń izdestirý bóliminiń basshysy Erik Nasyrbekov.
Qazir júrgizýshige qatysty QR ÁqK 610-babynyń 2-bólimi, 611-babynyń 2-bólimimen ákimshilik hattama toltyryldy.
Qyz bala qazir aýrýhanada em qabyldap jatyr. Dárigerlerdiń aıtýynsha, jaǵdaıy birqalypty.
Onyń aldynda qyzdyń anasy Alla Parhomenkomen tildesken bolatynbyz.
Onyń aıtýynsha, júrgizýshi balany qaqqan soń kólikke otyrǵyzyp alyp, qyzdy 3 aıaldamadan soń túsirip ketken.
